Sipas informacionit të marrë nga media britanike, MI6 lëshoi udhëzime sigurie se rajoni është i pasigurt për programet e deportimit të migrantëve për shkak të afërsisë me Rusinë.
Paralajmërimi përmban një vlerësim se krijimi i infrastrukturës së ndjeshme shtetërore në “sferën ruse të ndikimit” mund të mundësojë infiltrimin dhe funksionimin e agjentëve që punojnë për Kremlinin. Gjithashtu thuhet se migrantët e dërguar në rajon mund të bëhen shënjestra ose të shfrytëzohen nga regjimi i Presidentit Putin.
Këtë muaj, Kryeministri Starmer konfirmoi raportet e mëparshme se qeveria po negocionte me “disa vende” për të krijuar qendra kthimi.
Në listën e shkurtër prej rreth nëntë vendesh që janë marrë në konsideratë për pritjen e azilkërkuesve të refuzuar janë: Serbia, Kosova, Maqedonia e Veriut dhe Bosnja dhe Hercegovina. Ajo që është interesante është se Shqipëria ishte në listë, por kryeministri Edi Rama e përjashtoi atë nga shqyrtimi këtë muaj.
Përpjekja e dytë
Një plan për të ngritur qendra për emigrantët jashtë vendit, në Ballkan, ishte bllokuar tashmë për shkak të shqetësimeve të MI6 kur qeveria e mëparshme konservatore shqyrtoi një plan të ngjashëm të modeluar sipas deportimeve të Ruandës në vitin 2022. Në atë kohë, Shqipëria dhe Moldavia ishin gjithashtu në listë.
Burime të pavarura të sigurisë në Mbretërinë e Bashkuar tani pohojnë se të njëjtat shqetësime janë ngritur në lidhje me përpjekjet e Starmer për të rihapur një qendër për emigrantët në rajon.
“Na paralajmëruan se do të dërgonim njerëz direkt në sferën ruse të interesit. Ata deklaruan se infrastruktura, objektet dhe sistemet kombëtare britanike që do të instaloheshin atje mund të infiltroheshin nga agjentë rusë dhe persona të tjerë që punonin për Kremlinin. Ne praktikisht do të zhvendosnim një pjesë të interesit dhe territorit britanik në një zonë ku Rusia ka ndikim dukshëm më të madh sesa në pjesë të tjera të botës. Qëndrimi i shërbimeve të sigurisë ishte se kjo nuk ishte as e arsyeshme dhe as e qëndrueshme. Bazuar në provat në dispozicion, Rusia është e gatshme të përdorë migrimin si një mjet manipulimi.”
Ndikimi rus
Sipas burimeve të paidentifikuara të medias britanike, MI6 është e shqetësuar për të gjitha vendet e Ballkanit Perëndimor, me theks të veçantë në faktin se të gjitha ishin pjesë e ish-Jugosllavisë komuniste.
“Shqetësimet ndryshojnë në ashpërsi. Serbia është më problematikja, por edhe vende të tjera përbëjnë një kërcënim. Ky është ish-Jugosllavia, ndikimi rus është shumë i dukshëm. Rusia ka qindra mënyra për të ndikuar në këto qeveri në mënyrë dixhitale, fizike, përmes korrupsionit, përmes politikanëve pro-rusë ose përmes ndikimit indirekt në vendimmarrje.”
Burimet deklaruan gjithashtu se Presidenti serb Aleksandar Vuçiç është një aleat i ngushtë i Putinit dhe se ai vizitoi Moskën disa herë gjatë vitit të kaluar, përfshirë pjesëmarrjen në paradën ushtarake me rastin e Ditës së Fitores në maj.
Një arsye tjetër për shqetësim janë rregullat që lejojnë lëvizjen e lirë të qytetarëve rusë brenda dhe jashtë Serbisë, si dhe raportet për lëvizjen e lirë të armëve ruse nëpër atë vend.
Sipas informacionit nga Downing Street, qëllimi është të shpallen vendet pritëse të qendrave të kthimit deri në vjeshtën e vitit 2025, kur Britania e Madhe do të presë një takim të udhëheqësve të Ballkanit Perëndimor në Londër.
