Delegacionet ukrainase dhe ruse u takuan në Stamboll për një raund të dytë bisedimesh për paqe, me ndërmjetësimin e Turqisë. Diskutimet u përqendruan në shkëmbimet e të burgosurve të luftës, fëmijët e deportuar dhe një kuadër armëpushimi.
Një raund i dytë i bisedimeve te drejteperdrejta per paqe midis Rusisë dhe Ukrainës në Stamboll ka përfunduar, sipas një zëdhënësi të Ministrisë së Jashtme turke.
“Takimi mbaroi. Nuk përfundoi negativisht”, tha zëdhënësi i ministrisë, Oncu Keceli, për bisedimet në Pallatin Ciragan të Stambollit, të cilat zgjatën pak më shumë se një orë.
Rusia dhe Ukraina po punojnë për një shkëmbim të ri të të burgosurve pas bisedimeve, sipas presidentit ukrainas Zelensky.
Delegacionet “shkëmbyen dokumente përmes palës turke dhe ne po përgatisim një lirim të ri të të burgosurve të luftës”, tha ai gjatë një samiti që përfshinte udhëheqësit e NATO-se në Lituani.
Negociatorët ukrainas u dorëzuan gjithashtu zyrtarëve rusë një listë të fëmijëve “të deportuar ilegalisht” nga Moska gjatë pushtimit të saj, duke kërkuar kthimin e tyre, tha të hënën ndihmësi presidencial ukrainas Andriy Yermak.
“Sot, gjatë bisedimeve në Stamboll, pala ukrainase i dha zyrtarisht palës ruse një listë të fëmijëve ukrainas që duhen kthyer”, shkroi Yermak në rrjetet sociale.
“Po flasim për qindra fëmijë që Rusia i ka deportuar ilegalisht, i ka transferuar me forcë ose i ka mbajtur në territore të pushtuara përkohësisht”, shtoi ai.
“Çelësi i paqes së qëndrueshme është i qartë, agresori nuk duhet të marrë asnjë shpërblim për luftën”, u tha Zelensky gazetarëve në Vilnius. “Putini nuk duhet të marrë asgjë që do të justifikonte agresionin e tij.”
Bisedimet po zhvillohen në Pallatin historik Ciragan, me delegacionin turk – të udhëhequr nga Ministri i Jashtëm Hakan Fidan – që shërben si ndërmjetës.
Fillimisht e planifikuar të fillonte në orën 13:00, përgatitjet ishin ende duke u zhvilluar pas kohës së njoftuar. Përveç Fidanit, të pranishëm janë edhe Shefi i Shtabit të Përgjithshëm të Turqisë, Gjenerali Metin Gurak, dhe Shefi i Inteligjencës Ibrahim Kalin.
Përpara se të fillonin bisedimet e drejtpërdrejta, Fidan iu drejtua delegacioneve, duke thënë se qëllimi ishte përgatitja e terrenit për një takim të mundshëm midis Presidentit ukrainas Volodymyr Zelensky dhe Presidentit rus Vladimir Putin.
Ai tha se diskutimet do të përqendroheshin në çështjet humanitare, veçanërisht në një shkëmbim të mundshëm të të burgosurve, dhe do të shqyrtonin perspektivat për një armëpushim.
Fidan shtoi se Turqia mbetet e përkushtuar për të lehtësuar një zgjidhje paqësore dhe është e gatshme të mbështesë të dyja palët sipas nevojës.
Delegacioni rus pritet të paraqesë një të ashtuquajtur “memorandum” që përshkruan vizionin e tij për një armëpushim.
Zelensky miratoi përbërjen e re të delegacionit te Kievit me dekret. Ministri i Mbrojtjes Rustem Umerov kryeson përsëri ekipin, megjithëse ka pasur disa ndryshime në personel që nga takimi i 16 majit.
Oleksiy Malovatsky, kreu i Departamentit të së Drejtës Ndërkombëtare dhe Operacionale të Shtabit të Përgjithshëm të Ukrainës, është zëvendësuar nga zëvendësi i tij, Andriy Fomin.
Delegatët e tjerë përfshijnë Yuriy Kovbasa, përfaqësues i Komisionerit të Verkhovna Rada për të Drejtat e Njeriut në Sistemin e Sigurisë dhe Mbrojtjes, dhe Zëvendës Shefin e Shtabit të Përgjithshëm Yevhen Ostryansky.
Delegacioni i Rusisë mbetet i pandryshuar dhe kryesohet ende nga ndihmësi presidencial Vladimir Medinsky.
