Izraeli po furnizon me armë një grup xhihadist në Rripin e Gazës të lidhur me Shtetin Islamik, tha sot ligjvënësi i opozitës dhe ish-ministri i mbrojtjes Avigdor Lieberman, raporton Haaretz, duke shtuar se zyra e kryeministrit Benjamin Netanyahu u përgjigj se Izraeli “po lufton Hamasin në mënyra të ndryshme”.
Në një intervistë me radion publike Kan Bet, Lieberman tha se Netanyahu, ashtu siç mbështeti Hamasin si kundërpeshë ndaj Autoritetit Palestinez, tani po ndihmon në krijimin e një force të re të armatosur si kundërpeshë ndaj Hamasit.
Lieberman i tha radios se bëhej fjalë për grupin Abu Shabab, një bandë e armatosur që kundërshton Hamasin. “Qeveria izraelite po u jep armë një grupi kriminelësh dhe të dënuarish që identifikohen me Shtetin Islamik, me urdhër të kryeministrit. Për sa di unë, kjo nuk është miratuar nga kabineti”, theksoi Lieberman.
“Ato armë do të kthehen kundër nesh”
Javën e kaluar, dy burime i thanë gazetës Haaretz se një milici e re kishte filluar të vepronte së fundmi në Rripin jugor të Gazës, duke thënë se ishte e lidhur me një burrë që e identifikonte veten si Yasser Abu Shabab.
Izraeli po dërgon armë të lehta dhe pushkë sulmi, pohoi Lieberman, duke shtuar se “këto armë përfundimisht do të kthehen kundër nesh”. Duke iu përgjigjur akuzave, zyra e Netanyahut tha se “Izraeli po punon për të mposhtur Hamasin në mënyra të ndryshme, me rekomandimin e të gjithë udhëheqësve të sistemit të sigurisë”.
Burime nga Ministria e Mbrojtjes e Izraelit konfirmuan për Times of Israel se Tel Avivi u dorëzoi Kallashnikovë dhe armë të tjera anëtarëve të një grupi të armatosur në Gaza, me miratimin e Kryeministrit të atij vendi, Benjamin Netanyahu, por pa miratimin e Kabinetit të Luftës.
