Edhe Fushë Kosova, një nga komunat më të populluara në afërsi të Prishtinës, po përballet me problemin e menaxhimit të mbeturinave. Zonat përreth lagjeve, hapësirat afër shkollave dhe objekteve publike, gjithnjë e më shumë po mbushen me mbeturina të hedhura pa kontroll.
Banorët e kësaj komune shprehen të shqetësuar me gjendjen aktuale, teksa një pjesë të fajit për këtë gjendje ua hedhin mbingarkesës së madhe të kësaj komune dhe papërgjegjësisë së qytetarëve dhe asaj institucionale.
“Jo aq i pastër, sepse është qytet i mbingarkuar dhe në ndërtim. Thirrja ime është që institucionet të jenë më të përgjegjshme sidomos ndaj kritereve për ndërtim”, tha Ismet Toverlani, banor.
“Ne qytetarët e shohim këtë gjendje, por nuk kemi çfarë të bëjmë, ose duhet të pajtohemi me gjëra të mira ose të këqija”, tha një banor tjetër.
Nga opozita në këtë komunë thonë se kjo gjendje është si pasojë e mosplanifikimeve të duhura nga komuna.
“E gjithë kjo është si pasojë nga mungesa e një plani të Komunës. Që kur kanë nisur ndërtimet në këtë qytet, nuk janë paraparë pikat grumbulluese që do t’i ndihmonin edhe Kompanisë ‘Pastrimi’”, tha Durim Hajra, shef i asamblistëve të VV, Fushë Kosovë.
Ndërkaq, nga Komuna e Fushë Kosovës thonë se janë duke punuar për të gjetur alternativa të tjera për grumbullimin e mbeturinave.
“Kompania ‘Pastrimi’ me mundësitë e veta reflekton në Komunën tonë, sepse është regjionale. Deri më tani kemi arritur ta bëjmë grumbullimin e mbeturinave me kohë. Edhe pse Komuna ka ofruar resurse të veta për grumbullimin e tyre, prapë kemi mungesë të disa mjeteve dhe derivateve. Deri tani situata nuk është urgjente, por as stabile. Kemi themeluar një grup punues ku jemi duke punuar me kompaninë. Po ashtu, jemi duke gjetur alternativa tjera në situatë që kur ndërmarrja nuk mundet të kryejë detyrat e veta, ta bëjmë ne”, tha Besnik Osmani, nënkryetar i Fushë Kosovës.
Ai shtoi se Fushë Kosova ka shënuar rritje të banorëve dhe të bizneseve, prandaj theksoi se janë të nevojshme më shumë resurse nga ndërmarrja “Pastrimi” që qyteti të jetë më i pastër.
