Projekti `Ndërtimi i shkallëve për ngjitje te Guri i Shpuar` është një iniciativë e Komunës së Kaçanikut, e cila po ashtu ka financuar këtë investim. Vlera e projektit, sipas kontratës me operatorin ekonomik, arrin afërsisht 218 mijë euro.
Pranverë Loku-Zharku drejtoreshë për zhvillim ekonomik dhe turizëm thekson për RTK, se për shkak të terrenit jashtëzakonisht të vështirë dhe sfidave të hasura gjatë implementimit, ka pasur vonesa në përfundimin e projektit.
Megjithatë, punimet aktualisht ndodhen në fazën finale dhe pritet të përfundojnë së shpejti.
Sipas saj qëllimi kryesor i këtij projekti është promovimi i vlerave historike, kulturore dhe natyrore të Grykës së Kaçanikut një zonë e njohur në historinë shqiptare për rezistencën e saj në luftërat kundër pushtuesve.
Në të njëjtën kohë, projekti synon të nxisë zhvillimin e turizmit në komunën e Kaçanikut, duke ofruar hapësira rekreative dhe shtigje të sigurta për këmbësorët. Këto shtigje do t’u shërbejnë jo vetëm banorëve të Kaçanikut, por edhe turistëve që duan të eksplorojnë Grykën dhe zonat përreth.
Për shkak të pamjes piktoreske dhe natyrës së veçantë, Gryka e Kaçanikut ka një potencial të jashtëzakonshëm për zhvillimin turistik në përgjithësi.
Edhe pa u përfunduar plotësisht projekti, është vënë re një ndikim pozitiv, pasi ai ka arritur të tërheqë vizitorë nga qytete të ndryshme të Kosovës, nga Republika e Maqedonisë së Veriut, si dhe turistë të huaj.
Komuna e Kaçanikut synon të realizojë këtë vit edhe një projekt tjetër ambicioz, “Ndërtimi i ballkonit panoramik”. Ky projekt do ta bëjë ngjitjen më atraktive dhe do të përmirësojë përvojën e vizitorëve në këtë shteg. Sa i përket trashëgimisë kulturore, Kaçaniku është i pasur me objekte historike dhe kulturore të rëndësishme, por sipas drejtoreshës Zharku buxheti i vogël po i kufizon investimet në këtë komunë.
Ky projekt përfaqëson një hap të rëndësishëm drejt ruajtjes së identitetit historik dhe zhvillimit të qëndrueshëm turistik në këtë rajon.
