Zëvendëskryeministri dhe ministri i Punëve të Jashtme të Malit të Zi, Ervin Ibrahimoviq, ka deklaruar se mbështetja e Malit të Zi për aplikimin e Kosovës për anëtarësim në Këshillin e Evropës nuk do të shkaktojë kriza në koalicionin aktual qeverisës.
“Çështja e anëtarësimit të Kosovës në Këshillin e Evropës dhe mbështetja e Malit të Zi për këtë kërkesë nuk do ta rrezikojë koalicionin qeverisës, sepse objektivat tona të politikës së jashtme janë të qarta”, theksoi Ibrahimoviq në një intervistë për Televizionin e Malit të Zi (TVCG), transmeton gazeta Vjesti.
Ai tha se Mali i Zi është i njohur nga partnerët ndërkombëtarë si një shtet që kultivon marrëdhënie të mira fqinjësore dhe se mbështetja për Kosovën është pjesë e rrugës evropiane të Podgoricës.
“Ne do ta mbështesim shtetin tonë mik, Kosovën, sepse është prioritet i politikës së jashtme që të bëhemi anëtarja e radhës e Bashkimit Evropian, dhe kjo nuk bie ndesh me atë rrugë”, deklaroi Ibrahimoviq.
Ministri po ashtu theksoi se Mali i Zi ka bërë përparim të rëndësishëm në procesin e integrimit evropian dhe se konferenca e ardhshme ndërqeveritare me BE-në do të konfirmojë këtë.
Ibrahimoviq u ndal edhe te çështja e politikës së vizave, duke thënë se janë bërë përpjekje të mëdha për të sqaruar qëndrimet e Malit të Zi para partnerëve evropianë.
“Mali i Zi është i njohur si partner i besueshëm dhe ne do të japim kontributin tonë për sigurinë kolektive, pavarësisht madhësisë sonë si shtet”, përfundoi ai.
Ibrahimoviq tha se Mali i Zi do të jetë pjesë e delegacionit në samitin e NATO-s në Hagë, ku do të diskutohet për rritjen e buxhetit për mbrojtje.
“Mali i Zi është i njohur si partner i besueshëm dhe ne do të japim kontributin tonë për sigurinë kolektive, pavarësisht madhësisë sonë si shtet”, tha Ibrahimoviq.
