Në Gjykatën Themelore në Prishtinë po vazhdon gjykimi për rastin “Banjska”. Seanca e së premtes po vazhdon me dëshminë e zyrtarit policor, Sedat Dushi.
“Dritën e parë e kam thye me një plumb, ndërsa të dytën me plumbin e dytë, e kisha armën drejtuar në qiell e kam vërejtur një dritë të kuqe, që ishte fluturake apo dron si i thonë, e kam marrë në shënjestur dy-tre rafalle, është tërhequr në drejtim të manastirit.
Çdoherë nën breshëri të plumbave është goditur edhe automjeti që transportonte rreshterin, e kam dëgjuar edhe ajrin e gomës kur është shpërthyer por ata kanë vazhduar drejt emergjencës. Ne të tjerët kemi vazhduar me të shtëna…”, ka thënë Dushi.
Tutje gjatë dëshmisë së tij, Dushi ka treguar momentin kur e ka marrë lajmin për vdekjen e rreshterit Afrim Bunjaku përmes radiolidhjes.
“Pas lajmit kur e ka komuniku Elezi përmës radiolidhjes kur thotë se e humbëm kolegun me keqardhje, derisa unë isha duke e transportuar kolegun Albanin, aty e kam ndjerë vetën të thyer, kur kam arritur ne spital kam qenë në gjendje të rëndë, por gjithëherë me shpresë se rreshteri është ende gjallë, pastaj edhe mjeku e ka konfirmuar vdekjen. Kam rënë në gjunj, duke kapur kokën dhe më nuk mbaj mend…pastaj e kam parë vetën të shtrirë në një krevat të Emergjencës”, tha ai.
Tutje dëshmitari tregoi për trajtimin mjekësor që ka marrë.
“Kam pas seanca të shumta me psikolog dhe psikiatër dhe pas ekzaminimeve të bëra nga mjekët dhe raportet e tyre, ka dalë se unë kam pasur trauma, dhe pengesa në të dëgjuar. Këtë e vëreja kur gruaja dhe fëmijët më kërkonin diçka. Vajza më thoshte babi s’po dëgjon”, ka deklaruar dëshmitari.
“Kemi qenë të kujdesshëm edhe në gjendje të rëndë, jemi kujdesur për banorët dhe pronat, e ata që na sulmuan atyre ua dhamë përgjigjen e merituar” deklaroi polici në përfundim të dëshmisë.
Më 18, 21, 22 dhe 24 korrik janë caktuar seancat për vazhdimin e gjykimit ka bërë të ditur kryetari i trupit gjykues Arben Hoti.
