Presidenca e Republikës së Kosovës ka njoftuar se sot është vazhduar mandati teknik i misionit të EULEX-it në Kosovë nëpërmjet shkëmbimit të letrave me Bashkimin Evropian.
“Nëpërmjet shkëmbimit të letrave me BE-në, vazhdohet mandati teknik i misionit të EULEX në Kosovë Sot, nëpërmjet shkëmbimit të letrave me BE-në, është vazhduar mandati teknik i misionit të EULEX. Në letrën e saj, Presidentja Osmani ka theksuar se ky mandat teknik, pra pa fuqi ekzekutive, mbetet i fokusuar në aspektet e monitorimit, mentorimit dhe këshilldhënies”, thuhet në njoftimin e Presidencës në Facebook.
Bëhet e ditur se në letrën e saj drejtuar Përfaqësueses së Lartë të BE-së, znj. Kaja Kallas, Presidentja Vjosa Osmani ka kërkuar që EULEX t’i përcjellë autoriteteve të Republikës së Kosovës të gjitha dokumentet që posedon nga koha kur kishte mandat ekzekutiv.
“Gjithashtu ka kërkuar që të gjitha aktivitetet e EULEX të jenë në përputhje me Konventën Evropiane për të Drejtat e Njeriut dhe praktikën gjyqësore të Gjykatës Evropiane për të Drejtat e Njeriut”, theksohet në njoftim.
