Kompania Rajonale e Mbeturinave “Pastrimi” ka reaguar ndaj vendimit të Organit Shqyrtues të Prokurimit, lidhur me ankesën e dorëzuar për tenderin në vlerë prej 16.5 milionë euro, të shpallur nga Komuna e Prishtinës për angazhimin e operatorëve privatë në ofrimin e shërbimeve të pastrimit. Vendimin e kanë quajtur të paprecedentë dhe të pajustifikueshëm.
“OSHP ka deklaruar se nuk ka juridiksion për ta shqyrtuar këtë çështje, një vendim i paprecedentë dhe i pajustifikueshëm, duke marrë parasysh se bëhet fjalë për një kontest të prokurimit publik, që hyn drejtpërdrejt në fushëveprimin e këtij institucioni. Për më tepër, vendimi në asnjë pjesë të tij nuk i jep të drejtë apo legjitimitet veprimeve të Komunës së Prishtinës, duke ia lënë në kompetencë gjykatave dhe organeve të tjera që mbikëqyrin kundërligjshmëritë”, thuhet në reagimin e “Pastrimit”.
Sipas tyre, aktgjykimi i Gjykatës Supreme i ka dhënë përgjigjen përfundimtare Komunës së Prishtinës në ndalimin ligjor për angazhimin dhe tenderimin për çështjen e mbeturinave, dhe për këtë, thonë ata, edhe ky qëndrim i OSHP-së nuk ka trajtuar çështjen sipas parimit bazë nga ajo çka ka vendosur Gjykata Supreme.
“KRM “Pastrimi” do të dorëzojë ankesë ndaj këtij vendimi dhe do të ndjekë të gjitha rrugët ligjore për të mbrojtur të drejtën e saj dhe për të siguruar një proces të drejtë dhe të paanshëm, siç e garanton ligji. Çdo veprim tjetër i Komunës së Prishtinës nga ajo çka përcakton vendimi i Gjykatës Supreme është i jashtëligjshëm. Nuk do të lejojmë falimentimin e KRM “Pastrimi” Sh.A., për të cilën Komuna qëllimisht po insiston për gjë të tillë”, thuhet në reagimin e KRM “Pastrimi”.
Ndërkohë më herët, kryetari i Prishtinës, Përparim Rama, duke iu referuar vendimit të OSHP-së, tha se sabotazha merr epilog dhe e drejta është në anën e Komunës së Prishtinës.
“Pas një sërë pengesash të qëllimshme nga kompania rajonale “Pastrimi” SH.A – përfshirë greva, bllokime dhe ankesa të njëpasnjëshme – Organi Shqyrtues i Prokurimit (OSHP) ka vendosur qartë: Komuna e Prishtinës ka të drejtë të vazhdojë me procedurat për përzgjedhjen e kompanisë që do të menaxhojë mbeturinat në kryeqytet. Kjo është një fitore për interesin publik dhe për të gjithë qytetarët që meritojnë një qytet të pastër dhe një shërbim të mirëfilltë”, shkroi ai.
Sipas Ramës, me vendimin e OSHP-së i jepet fund një bllokade, siç thotë ai, të padrejtë që kishte për qëllim sabotimin e procesit të prokurimit, i zhvilluar me procedurë të hapur dhe në përputhje të plotë me ligjin.
“Komuna do të vazhdojë me përkushtim për të garantuar një sistem të qëndrueshëm dhe të përgjegjshëm të menaxhimit të mbeturinave, duke vendosur qytetarin në qendër të çdo vendimi.
