Kryetari i Komunës së Prishtinës, Përparim Rama, ka pritur në takim grupin “Shkodra Elektronike”, të cilëve i ka dhuruar në shenjë simbolike, Hyjneshën në Fron.
Në njoftimin e fotografitë e shpërndara nga faqja zyrtare e Komunës së Prishtinës, thuhet se kryeqyteti është gjithmonë hapësirë e mirëseardhjes për artin që flet me zemër.
“Kur përfaqësimi bëhet përmes artit që rrënjët i ka në shpirtin tonë kolektiv, atëherë jemi të gjithë bashkë, një zë, një ritëm, një emocion. Mirëpritëm në Odën e Kryeqytetit grupin Shkodra Elektronike, krijues të një muzike që tejkalon kufij dhe e bën krenar secilin prej nesh. Në shenjë simbolike, u dhuruam edhe Hyjneshën në Fron, një figurë që mishëron shpirtin tonë krijues”, bëhet e ditur nga komuna për takimin.
Kanë thënë se energjia e tyre, origjinaliteti dhe fuqia artistike janë frymëzim për të gjithë ata që e duan artin si formë identiteti.
Shkodra Elektronike me këngën “Zjerm” përfaqësoi Shqipërinë në Eurovision këtë vit duke u renditur e teta në garë.
