RTSH
Tirana mirëpriti të martën Forumin e 2-të Konsultativ të Prokurorëve të Përgjithshëm dhe Prokurorëve Specialë të Ballkanit Perëndimor.
Në forum morën pjesë prokurorët e përgjithshëm dhe specialë të vendeve të rajonit, presidenti i Eurojust, kryeprokurori i SPAK, kreu i Prokurorisë së Përgjithshme, si dhe ambasadori i Bashkimit Europian në Shqipëri, Silvio Gonzato.
Axgjnda përfshiu sesione mbi forcimin e bashkëpunimit në luftën kundër krimit të organizuar dhe korrupsionit, si dhe takime bilaterale mes delegacioneve pjesëmarrëse dhe Presidentit të Eurojust.
Në fjalën e tij përshëndetëse, ambasadori Gonzato bëri thirrje për ta luftuar së bashku krimin e organizuar dhe korrupsionin, duke theksuar se rezultatet në këtë fushë ndikojnë edhe te procesi i integrimit të vendeve aspirante për në BE.
“Puna juaj si kryeprokurorë ndikon drejtpërdrejt në anëtarësimin në BE. Shërbimet e pavarura të prokurorisë, që mund të hetojnë e të ndjekin penalisht krimin pa frikë e pa favore janë parakushte thelbësore për anëtarësimin në BE. Kur prokurorët në rajon punojnë së bashku duke ndarë praktikat më të mira e duke bashkërenduar hetimet, forconi jo vetëm sistemet individuale të drejtësisë, por të tërë strukturën e bashkëpunimit gjyqësor europian,” deklaroi z. Gonzato.
Një problem që vuri në pah diplomati europian janë asetet e konsiderueshme nga aktivitetet kriminale. Ai tha se Shqipëria ka përparuar shumë në drejtim të ndjekjes së veprave si korrupsioni dhe krimi ndërkufitar, por një detyrë që i mbetet për të bërë përmirësimi i legjislacionit për sa i përket konfiskimit dhe rishpërndarjes së parave të tilla për qëllime të tjera ekonomie.
“Gjatë viteve të shkuara kemi parë përparim në bashkëpunimin e prokurorëve në mbarë rajonin, rritjen e përdorimit të njësive të përbashkëta të hetimit dhe ndarja e informacioneve të inteligjencës ka dhënë rezultate konkrete. E kemi parë këtë në Shqipëri, ku ka pasur një rritje të raste të profilit të lartë që përfshin krimin ndërkufitar, pastrimin e parave, korrupsionin, që po hetohen me sukses e po ndiqen penalisht përmes përpjekjeve bashkëpunuese me shtetet anëtare të BE-së përmes bashkëpunimit me agjencitë e BE-së, si Eurojust, Europol dhe Zyra e Prokurorisë Europiane. Këto arritje dërgojnë një sinjal shumë të qartë: drejtësia nuk njeh kufij dhe pandëshkueshmëria nuk ka vend në shoqëritë tona.
Megjithatë na duhet të pranojmë edhe ato sfida që vazhdojnë të jenë të pranishme: trysnia politike mbi institucionet e drejtësisë, kufizimet në burime dhe po ashtu natyra në zhvillim e krimit ndërkombëtar, që kërkon vigjilencë dhe nisma konkrete për të forcuar kuadrin ligjor e institucional, si dhe burimet financiare njerëzore. Krimi i organizuar dhe korrupsioni gjenerojnë shumë pasuri. Këto para dhe pasuri duhen gjurmuar, sekuestruar, konfiskuar e ripërdorur për qëllime të tjera ekonomike. Identifikimi i të ardhurave nga krimi është thelbësor në Shqipëri. Presim me padurim miratimin e një ligji të rëndësishëm nga parlamenti për një zyrë të rikuperimit të aseteve, që do e nxisë dhe përmirësojë më tepër këtë veprimtari,” tha ambasadori.
Takimi i prokurorëve të rajonit do të përmbyllet me konkluzionet dhe planifikimin për edicionin e ardhshëm të Forumit në vitin 2026.
