Pasi u shfaqën informacionet se si Trump mund të miratonte pjesëmarrjen e ushtrisë amerikane në luftën në Iran, duket se po vijnë rebelimet e para brenda Kongresit për këtë akt.
Përfaqësuesi republikan Thomas Massie dhe demokrati Ro Khanna thanë se do të propozonin një masë që do ta detyronte Trumpin të merrte miratimin e Kongresit për të hyrë në konfliktin e Izraelit me Iranin.
“Kjo nuk është lufta jonë. Nëse është, Kongresi duhet të vendosë për çështje të tilla në përputhje me Kushtetutën tonë. Unë do të paraqes një rezolutë dypartiake për fuqitë e luftës për të ndaluar pjesëmarrjen tonë. I bëj thirrje të gjithë anëtarëve të Kongresit ta mbështesin këtë rezolutë”, deklaroi Massie.
Rashida Tlaib komentoi gjithashtu mbi rezolutën, duke thënë se do ta mbështeste këtë dokument në Kongres.
“Pres me padurim ta mbështes këtë Rezolutë për Fuqitë e Luftës. Populli amerikan nuk do ta besojë më këtë. Na gënjyen për armët e shkatërrimit në masë në Irak që vranë miliona njerëz dhe ndryshuan jetë përgjithmonë. Është e papranueshme që Trump të shkojë në luftë pa votë në Kongres”, tha ajo.
