Universiteti i Prishtinës ka nderuar me titullin “Doctor Honoris Causa” juristin japonez Hisashi Owada, një nga emrat më të shquar të së drejtës ndërkombëtare në botë.
Rektori i UP-së, Arben Hajrullahu, gjatë ceremonisë theksoi se profesori Hisashi Owada ka dëshmuar se parimet dhe siguria ligjore nuk janë ideale abstrakte, por udhërrëfyese për qeverisje më të drejtë, paqe dhe bashkëpunim në nivel global.
“Në këtë frymë Opinioni i GJND-së i vitit 2010, që konstatoi se shpallja e pavarësisë së Kosovës nuk ishte në kundërshtim me të drejtën ndërkombëtare, ishte dhe mbetet një nga momentet më të rëndësishme në historinë moderne të Kosovës. Ai rikonfirmoi të vërtetën e popullit të Kosovës se liria, pavarësia, demokracia nuk ishin vetëm zgjedhje politike, por edhe një monument etik, që do të mbetet thellësisht i skalitur në kujtesën historike përderisa ne sot kujtojmë vlerat mbi të cilat është ndërtuar shteti ynë: barazinë, qytetarinë, gjithëpërfshirjen dhe paqen”, ka thënë Hajrullahu.
Owada ishte kryetar i Gjykatës Ndërkombëtare të Drejtësisë në kohën kur kjo gjykatë lëshoi opinionin se pavarësia e Kosovës, e shpallur në vitin 2008, nuk i ka shkelur ligjet ndërkombëtare.
