Diplomatët më të lartë nga 27 vendet e bllokut duhej të mblidheshin në Bruksel për bisedime mbi një sërë çështjesh, nga lufta e Rusisë në Ukrainë te Gaza, por tani pritet që Irani të dominojë axhendën.
Kryediplomatja e Bashkimit Evropian, Kaja Kallas, bëri thirrje të dielën për uljen e tensioneve dhe një rikthim në negociata, pasi Shtetet e Bashkuara iu bashkuan luftës së Izraelit me Iranin duke goditur centralet bërthamore të vendit.
Kallas tha se Iranit nuk duhet t’i lejohet të zhvillojë një armë bërthamore, duke e përshkruar mundësinë si “një kërcënim për sigurinë ndërkombëtare” – por theksoi se Brukseli mbetet i përkushtuar ndaj diplomacisë, në një moment kritik për Lindjen e Mesme.
“U bëj thirrje të gjitha palëve të tërhiqen, të kthehen në tryezën e negociatave dhe të parandalojnë përshkallëzimin e mëtejshëm”, shkroi Kallas në X, duke shtuar se ministrat e jashtëm të BE-së do të diskutojnë situatën të hënën.
Diplomatët më të lartë nga 27 vendet e bllokut duhej të mblidheshin në Bruksel për bisedime mbi një sërë çështjesh, nga lufta e Rusisë në Ukrainë te Gaza, por tani pritet që Irani të dominojë axhendën.
Apeli i Kallas erdhi pasi ajo iu bashkua diplomatëve të lartë nga Franca, Gjermania dhe Britania për bisedime me Ministrin e Jashtëm iranian Abbas Araghchi në Gjenevë të premten.
Fuqitë evropiane i kishin kërkuar Teheranit të ringjallte përpjekjet diplomatike me Shtetet e Bashkuara për të gjetur një zgjidhje në ngërçin rreth programit të tij bërthamor.
Por Irani ishte kundërpërgjigjur se mund të merrte në konsideratë diplomacinë vetëm pasi Izraeli të ndalonte bombardimet e republikës islamike.
Izraeli nisi një fushatë të paprecedentë bombardimi ndaj Iranit më 13 qershor. Teherani është përgjigjur duke qëlluar raketa drejt Izraelit dhe është zotuar të hakmerret nëse Uashingtoni bashkohet.
