Arbëreshë Krasniqi, deputete nga Nisma, subjekt që drejtohet nga Fatmir Limaj, ka thënë se lideri i partisë e ka vullnetin dhe gatishmërinë që të jap kontribut profesional e politik për të dalë nga situata aktuale.
“Kushdo që e fton për të diskutuar për t’u takuar, Limaj është i gatshëm ta jap kontributin e tij, profesional e politik”, tha Krasniqi kur u pyet nëse ka pasur takim me ndonjë prej liderëve këto ditë.
Sipas saj, qëndrimet e Nismës janë të njohura dhe tha se të gjitha subjektet politike, përveç përgjegjësisë që e kanë për të kërkuar votën, është e rëndësishme ta arsyetojnë edhe besimin qytetarë.
“Unë jam e bindur që qytetarët janë të vetëdijshëm dhe e kuptojnë drejt dhe jam e bindur që edhe ata qytetarë të Kosovës të cilët nuk e kanë ditur saktë si qëndron situata me subjektet politike, tanimë për këtë muaj janë në gjendje ta dinë drejt dhe saktë se cila është situata. Jo në forma histerike që ta arsyetojnë veprimin dhe votën apo besimin qytetar, por duhet të jenë në gjendje të ulen e të diskutojnë, të japin ide të shkëmbejnë ide që është një zgjidhje”, tha ajo.
Sipas deputetes së Nismës të gjitha subjektet politike nga e para që doli nga zgjedhjet e deri te partia ku ajo bënë pjesë që janë tre deputetë e kanë përgjegjësinë edhe për rritjen e çmimeve, edhe për rrymën, për shëndetësinë e deri te librat që tha se do të shpërndahen për nxënësit. “Nisma po mundohet me kapacitetin saj aq sa mundet të kontribuojë”, deklaroi deputetja Krasniqi.
