Serbia pezullon eksportin e armëve dhe pajisjeve ushtarake të prodhuara në Republikën e Serbisë, njoftoi Ministria e Mbrojtjes e Serbisë.
Kjo po ndodh në përputhje me udhëzimet e Presidentit serb, Komandantit Suprem të Ushtrisë Serbe dhe Kryetarit të Këshillit të Sigurisë Kombëtare, Aleksandar Vuçiç.
“Në të ardhmen, për eksportin e armëve dhe pajisjeve ushtarake të prodhuara në fabrikat e industrisë së mbrojtjes, përveç pëlqimit të ministrive dhe agjencive të tjera kompetente, pëlqimi i Këshillit të Sigurisë Kombëtare do të jetë i detyrueshëm në përputhje me nenin 16, paragrafi 4 i Ligjit për Eksportin dhe Importin e Armëve dhe Pajisjeve Ushtarake”, thuhet në deklaratë.
Le të kujtojmë se Shërbimi i Inteligjencës së Jashtme Ruse njoftoi sot se municionet e prodhuara në kompanitë e mbrojtjes në Serbi, kryesisht për sisteme të rënda me rreze të gjatë veprimi, po dërgohen në vendet e NATO-s në interes të Ukrainës në formën e kompleteve të plota dhe pjesëve të montimit.
Njoftimi shton se, sipas informacionit të marrë nga Shërbimi i Inteligjencës së Jashtme të Rusisë, “ushtria ukrainase është shumë mirënjohëse ndaj prodhuesve serb të armëve dhe municioneve për kontributin e tyre në ruajtjen e gatishmërisë luftarake të Forcave të Armatosura të Ukrainës”.
Përpara sulmit izraelit ndaj Iranit, presidenti serb tha se Serbia është e vetmja në Evropë që bën biznes me Izraelin në fushën e municioneve ushtarake.
Në Serbi ka disa fabrika që prodhojnë armë dhe pajisje ushtarake.
