“Shtëpia e Bardhë – Zonë e Krimit”. Kështu e ka quajtur Lëvizja Vetëvendosje Komunën e Prizrenit, teksa ka reaguar ashpër ndaj raportit të Zyrës Kombëtare të Auditimit për pasqyrat financiare vjetore të vitit 2024 në Komunën e Prizrenit, duke e cilësuar administratën aktuale si të zhytur në shkelje ligjore, keqmenaxhim dhe abuzim me paratë publike.
Në një postim në Facebook, LVV në Prizren e përshkruan qeverisjen lokale si të “klanit Totaj – Elshani”.
“Gjetjet e Auditorit për vitin 2024 në Komunën e Prizrenit janë skandaloze. Në shumë prej gjetjeve të tij pajtohet edhe ekzekutivi komunal, përfshirë dhe kryetarin Totaj”, thuhet në reagimin e LVV-së në Prizren.
Tutje ata kanë renditur disa nga të gjeturat e raportit të auditimit: “2.3 milionë euro të raportuara rrejshëm si detyrime gjyqësore – nuk përputheshin me dokumentet zyrtare. Mbivlerësim që çon në planifikim të rremë buxhetor. 846 mijë euro të keqklasifikuara – Paga, shujta dhe larje rrugësh janë paguar nga investimet kapitale, duke dëmtuar projekte madhore. 645 mijë euro pasuri komunale të paregjistruara – shkolla, rrugë e objekte publike që “nuk ekzistojnë” në regjistra financiarë”, thuhet tutje në reagim.
Sipas LVV-së, raporti ka gjetur 71 mijë euro të ardhura të mbivlerësuara – për shkak të mosazhurnimit të regjistrit të borxheve, shifra të fryra për të krijuar perceptim stabiliteti, pastaj 1.7 milionë euro kontratë publike e ndryshuar pa leje. Prokurime të mëdha pa fonde në buxhet – për projekte në vlerë prej mbi 4 milionë €, subvencione të ndara në kundërshtim me rregulloret , vonesa ekstreme në pagesat e faturave etj.
