Prokuroria Speciale ka konfirmuar për RTK-në intervistimin e Martin Berishajt rreth dyshimeve për tri vepra penale.
“Referuar kërkesës suaj, mund të konfirmojmë se z.Martin Berishaj është intervistuar të enjten nga Prokuroria Speciale, në kuadër të hetimeve që janë duke u zhvilluar ndaj tij lidhur me veprat penale “Shpëlarje e parave”, “Shmangie nga Tatimi” dhe “Mos raportimi apo raportimi i rremë i pasurisë, i të ardhurave, i dhuratave , i dobisë tjetër materiale ose i detyrimeve financiare”, ka konfirmuar zëdhënësja e kësaj prokurorie, Arbnora Luta.
Ndërkaq, avokati i Berishajt, Tomë Gashi ka thënë se klienti i tij ka dhënë ‘deklaratë sqaruese’ dhe sipas tij ajo do të ndihmojë për të eliminuar çdo dyshim për aferën e ndërtuar nga gazetari serb.
“Për t’i ndihmuar Prokurorisë Speciale të Kosovës, sot Martin Berishaj ka dhënë deklaratë sqaruese me të cilën ne besojmë që i ka ndihmuar Prokurorisë për të eliminuar çdo dyshim për aferën e ndërtuar nga gazetari serb i afërm me shërbimin sekret të Serbisë, me qëllim të dëmtimit të reputacionit të profesorit Martin Berishaj, i cili është halë në sy të Serbisë edhe të disave që me vetëdije apo pa vetëdije i shtyjnë agjendat e Serbisë”, ka shkruar ndër të tjera Gashi në Facebook.
Martin Berishaj vazhdon të shërbejë si ambasador i Republikës së Kosovës në Republikën e Kroacisë që nga viti 2021.
