Ushtria ukrainase tha se kishte goditur katër avionë luftarakë në një bazë ajrore në rajonin e Volgogradit në Rusinë qendrore.
Në një postim në Telegram, ushtria ukrainase tha se rrëzoi katër avionë Su-34 në bazën Marinovka pranë qytetit të Volgogradit, rreth 900 kilometra larg kufirit ukrainas. Sipas njoftimit, operacioni u krye nga njësia e operacioneve speciale të ushtrisë ukrainase, së bashku me shërbimin e sigurisë SBU dhe njësi të tjera të ushtrisë.
“Sipas informacioneve fillestare, u goditën katër avionë, konkretisht Su-34, si dhe objekte teknike dhe operacionale ku servisohen dhe riparohen avionë të ndryshëm ushtarakë”, thuhet në deklaratë. Ushtria ruse nuk komentoi mbi akuzat.
Ushtria e Ukrainës është angazhuar në operacione të shumta me rreze të gjatë veprimi kundër objektivave ushtarake në muajt e fundit, duke synuar vende industriale, energjitike dhe vende të tjera.
Më herët këtë muaj, ushtria ukrainase kreu një sulm të madh të quajtur Operacioni “Rrjeta e Merimangës”, kur shkatërroi dhe dëmtoi një numër bombarduesish rusë me rreze të gjatë veprimi në disa baza ajrore ruse larg territorit ukrainas.
Njoftimi i fundit ukrainas thotë se dëmet e shkaktuara nga sulmi në Marinovka janë ende duke u vlerësuar. Shtohet se Su-34 është avioni më i rëndësishëm rus që përdoret për bombardimin e territorit ukrainas, veçanërisht për lëshimin e bombave të drejtuara, të cilat përdoren gjithnjë e më shumë në sulmet ndaj qyteteve ukrainase.
