Kryetari i Lidhjes Demokratike të Kosovës, Lumir Abdixhiku, pas përfundimit të takimit të thirrur nga lideri i Vetëvendosjes, Albin Kurti, si partia e parë që ka dalë nga zgjedhjet e 9 shkurtit, tha se Kosova vazhdon të mbetet në krizë.
Sipas tij, pas 30 ditësh do të duhej me siguri edhe një interpretim i ri, e tha se LDK-ja shpreson në involvimin e presidentes së Kosovës.
“Fatkeqësisht, nga një parti e parë që ka 48 deputetë dhe nuk arrin e nuk do të bëjë një shumicë, pas 30 ditësh futemi në një gjendje të paqartë historike për Kosovën. Pas 30 ditësh do të duhej me siguri edhe një interpretim i ri. Në këtë fazë LDK-ja shpreson në involvimin e presidentes së Kosovës që brenda nenit 4 të Kushtetutës të ushtrojë kompetencat e veta për funksionimin demokratik të institucioneve të Kosovës”, tha Abdixhiku.
Ai ka thënë se qëndrimet e thirrësit të takimit ishin të njëjta sikurse ato paraprake.
“Së bashku me nënkryetaren e LDK-së, deputeten Bajrami morën pjesë me vullnetin e qëllimin më të mirë për të gjetur zgjedhje, ndonëse në të njëjtën kohë me drojën që i gjithë ky takim ishte më tepër një farsë publike se sa substanciale. Fatkeqësisht, droja jonë u vërtetua në këtë takim meqë qëndrimet e deputetit Kurti, thirrësit të këtij takimi ishin të njëjta, ato që kanë qenë deri më tani”, tha lideri i LDK-së.
Abdixhiku tha se Kurti në takim e pranoi se nuk e ka shumicën, por kërkoi kushtëzime.
“Për LDK-në është evidente që përgjegjësia për krijimin e shumicës i takon Kurtit me paragrafin 130 të aktvendimit të Gjykatës Kushtetuese. Edhe e drejta edhe përgjegjësia për të bërë shumicë. Kurti e pranoi që nuk ka shumicë, por kërkoi kushtëzime në pozicionet paraprake që ka pasur deri tani. Të votohet fshehtë ose të rrëzohet votimi i fshehtë, duke u votuar Haxhiun sërish, dhe më pas një ndërlidhje e përçudnuar e votimit për kryetar të Kuvendit me nënkryetarë. Mos lëvizja nga këto pozicione e bënë fatkeqe gjendjen e tanishme politike”, tha Abdixhiku.
Kreu i LDK-së tha se në takim pati një propozim nga LVV-ja që të votohet komisioni për votimin e fshehtë e më pas të rrëzohet i njëjti, sipas tij, me kushtin që të zgjidhjet, Albulena Haxhiu për kryetare të Kuvendit.
Abdixhiku, deklaroi para gazetarëve se mosrespektimi i aktgjykimit të Kushtetueses për LDK-në është hap i parë në përmbysjen e rendit kushtetues.
