Shtetet e Bashkuara përgjuan një telefonatë midis dy zyrtarëve iranianë që diskutonin sulmet amerikane ndaj objekteve bërthamore të Iranit. Gjatë telefonatës, zyrtarët thanë se sulmet ishin më pak shkatërruese nga sa pritej, raportoi The Washington Post, duke cituar katër burime të njohura me inteligjencën e klasifikuar.
Shtëpia e Bardhë nuk e mohoi ekzistencën e mesazhit të përgjuar, por nuk u pajtua me përfundimet e zyrtarëve iranianë dhe vuri në dyshim aftësinë e tyre për të vlerësuar dëmin në tre lokacionet bërthamore të synuara nga operacioni amerikan.
“Ideja që zyrtarët iranianë, të paidentifikuar, e dinë se çfarë po ndodh nën qindra metra rrënoja është absurde. Programi i tyre i armëve bërthamore ka mbaruar”, tha sekretarja e shtypit e Shtëpisë së Bardhë, Caroline Leavitt.
Zyra e Drejtorit të Inteligjencës Kombëtare i tha gazetës se “një informacion i vetëm nuk ofron një pamje të plotë të inteligjencës”.
“Një telefonatë e vetme midis iranianëve të paidentifikuar nuk është e njëjtë me një vlerësim të inteligjencës që merr në konsideratë tërësinë e provave nga burime të shumëfishta”, tha një zyrtar i lartë i inteligjencës amerikane.
Më parë, kreu i Agjencisë Ndërkombëtare të Energjisë Atomike, Rafael Grossi, tha se Irani ruante kapacitetin teknik për të rifilluar prodhimin e uraniumit të pasuruar dhe mund ta rikthente atë brenda pak muajsh. Sipas tij, sulmet izraelite dhe amerikane ndaj objekteve bërthamore iraniane shkaktuan dëme serioze, por jo fatale.
Pas sulmeve ajrore izraelite dhe amerikane, Presidenti Donald Trump tha se objektet iraniane ishin shkatërruar plotësisht. Burime të CNN dhe The New York Times thanë se sulmet e kishin ndaluar vetëm përkohësisht programin. Sipas Financial Times, pjesa më e madhe e rezervave të uraniumit të pasuruar në nivel të lartë mbeti e paprekur.
