Komisionerja për Zgjerim, Marta Kos, sot në Shkup do të takohet me liderët nga Shqipëria, Bosnja dhe Hercegovina, Kosova, Mali i Zi, Maqedonia e Veriut dhe Serbia për të përshpejtuar zbatimin e Planit të Rritjes së BE-së për Ballkanin Perëndimor.
Drejtoria e Përgjithshme për Zgjerimin dhe Fqinjësinë Lindore, njofton se plani ofron përfitime për ata që përgatiten për anëtarësim në BE, dhe ky takim do të shqyrtojë progresin dhe do të diskutojë hapat e ardhshëm.
“Liderët do të punojnë me Komisioneren Kos për t’i shndërruar zotimet në veprim, duke u përqendruar në reformat kritike për të çliruar financimin sipas Planit të Rritjes dhe për të sjellë përfitime konkrete për qytetarët e vendeve kandidate përpara anëtarësimit”, thuhet në njoftim.
Samiti do të jetë gjithashtu një mundësi për të diskutuar fusha të reja bashkëpunimi: mbrojtjen e konsumatorit, turizmin dhe Autostradën e Tregut të Përbashkët, me synim avancimin e integrimit ekonomik të Ballkanit Perëndimor në Tregun e Përbashkët të BE-së.
Si pjesë e diskutimeve, Komisioni do të propozojë gjithashtu një paketë investimi prej 87.7 milionë euro brenda Kornizës së Investimeve për Ballkanin Perëndimor (WBIF). Kjo paketë pritet të mobilizojë gati gjysmë miliardi euro investime private në projekte të energjisë së pastër në të gjithë rajonin.
Plani i Rritjes së BE-së për Ballkanin Perëndimor synon të forcojë ekonominë e rajonit dhe të ndihmojë vendet e tij të anëtarësohen në BE.
Ai ofron 6 miliardë euro financime për reforma dhe investime në fusha si energjia, transporti dhe transformimi digjital, me synimin për të rritur mirëqenien dhe stabilitetin në rajon.
Një konferencë për shtyp me Komisioneren Kos dhe Kryeministrin e Maqedonisë së Veriut, Hristijan Mickoski, do të transmetohet më 1 korrik në orën 12:15.
