Shkruan: Rasim SMAJLAJ
Presidente përdore autoritetin
Sepse Kushtetuta nuk i kthjelli politikanët. Ata nuk po kthehen te populli. Nëse nuk veprohet, shumë shpejt do t’i përpijnë flakareshat e zemërimit qytetar.
40 herë është dështuar të konstituohet Kuvendi. Një absurditet që s’e ka parë as rajoni, as demokracia. Po të kishte ndërgjegje politike, shumica prej liderëve do të kishin dhënë dorëheqje. Por jo – Albin Kurti, Memli Krasniqi, Lumir Abdixhiku e Ramush Haradinaj janë ngujuar në kulla partie, duke llogaritur vetëm përfitime të ngushta e ego personale.
E ndërkohë populli pret. Pret më kot.
Presidentes nuk i ka mbetur kohë për të heshtur. As për të bërë rol ceremonial.
Është koha për vendim të prerë, për dekret të guximshëm: zgjedhje të jashtëzakonshme!
Kur politikanët nuk duan të dëgjojnë as Kushtetutën, as votën e qytetarit, atëherë veprimi duhet të vijë nga institucioni më i lartë i unitetit – Presidenca. Sepse ky vend nuk mund të mbahet peng i një grushti liderësh që as nuk udhëheqin, as nuk tërhiqen.
Zonja Presidente,
sot populli nuk kërkon as mëshirë, as privilegj. Kërkon të drejtën për të vendosur vetë. Sepse vendin nuk e ndreqin më tryezat me filxhan kafeje mes partive, por vetëm kutia e votimit.
Nëse s’i kthejmë qytetarët në qendrat e votimit, shumë shpejt do t’i kemi në sheshe. E turma e protestës nuk njeh më “të preferuar”, i djeg të gjithë pa dallim.
Apel për qytetarët:
Të dashur qytetarë,
Ky është momenti ku ne nuk duhet të rrimë më spektatorë. Nuk jemi më në kohën kur udhëheqësit mund të luajnë lojën e tyre dhe ne të heshtim.
Le ta bëjmë zërin tonë të dëgjohet.
Të kërkojmë zgjedhje. Të kërkojmë drejtësi. Të kërkojmë Kosovën që e duam.
