Këshilli i BE-së për Çështje Ekonomike dhe Financiare (ECOFIN) i lejoi Bullgarisë dhe 14 vendeve të tjera anëtare të BE-së të shmangin përkohësisht rregullat e rrepta buxhetore, për të marrë borxh shtesë me qëllim financimin e shpenzimeve për mbrojtjen kombëtare. Masat synojnë të lehtësojnë kalimin e këtyre vendeve drejt rritjes së buxheteve të mbrojtjes në nivel kombëtar, duke ruajtur njëkohësisht qëndrueshmërinë e borxhit, bëhet e ditur në një njoftim për shtyp të Këshillit të BE-së, të cituar nga BTA.
Sipas rregullave të BE-së, shtetet anëtare duhet të mbajnë deficitin buxhetor nën 3% të PBB-së dhe borxhin publik nën 60% të PBB-së.
Sipas përjashtimit të ri, vendet anëtare mund të shpenzojnë shtesë deri në 1.5% të PBB-së së tyre për mbrojtje, pa u përballur me sanksione.
