Deputetja e PDK-së, Blerta Deliu-Kodra ka thënë se duhet të merret përgjegjësi për rastin e vdekjes të 27 vjeçarit në Lipjan.
Ajo para se të hynte në Kuvendin e Kosovës për tentimin e radhës për konstituim, tha se presin nga institucionet përgjegjëse të zbardhin rastin.
Ajo tha se vetëm sot kishte një deklarim nga kryeministri në detyrë, Albin Kurti.
“Është një akt absolutisht i rëndë dhe institucionet përgjegjëse që kanë mbetur për dy ditë në heshtje, vetëm sot kishim deklarimin e Kurtit, duhet të marrin masa dhe përgjegjësit duhet të ofrojnë përgjegjësi për këtë rast që ka goditur shoqërinë e Kosovës”, tha ajo.
Deliu-Kodra tha se për një akt të rëndë, përgjegjësia duhet të bartet nga të gjithë e përgjegjësit duhet të marrin dënimin e merituar e përgjegjësinë e merituar.
Deputetja e PDK-së tha se Policia e Kosovës për vite të tëra ka qenë një institucion me besueshmëri të thellë, e sipas saj rastet e fundit e kanë goditur këtë institucion.
“Pavarësisht kësaj unë vazhdoj të besoj që në Policinë e Kosovës ka djem e vajza që me përgjegjësi kanë kryer detyrat e tyre. Përgjegjësia duhet të jetë individuale e përgjegjësit duhet të marrin përgjegjësinë e të mos kemi rënie të besueshmërisë”, tha Deliu-Kodra.
