Dhoma e Tregtisë dhe Industrisë së Kosovës (DhTIK) i ka kërkuar Institucionit të Avokatit të Popullit të nisë një hetim lidhur me një vendim të Policisë së Kosovës dhe Agjencisë së Regjistrimit Civil, që sipas saj po dëmton rëndë funksionimin e bizneseve në vend.
Konkretisht, DhTIK ka ngritur shqetësimin për zbatimin e Nenit 89, paragrafi 4, të Ligjit Nr. 08/L-186 për Rregullat e Trafikut Rrugor, i cili ndalon regjistrimin e automjeteve për çdo subjekt juridik që ka të paktën një gjobë të papaguar për ndonjë automjet tjetër në pronësi të tij.
DhTIK thotë se kjo praktikë ka nisur të zbatohet më 31 maj 2025, dhe ka rezultuar që shumë biznese të mos mund të regjistrojnë automjete të reja përderisa nuk i paguajnë të gjitha gjobat, pavarësisht se për cilin automjet janë shqiptuar ato. DhTIK thekson se kjo ka shkaktuar pengesa serioze në aktivitetin ekonomik, ka dëmtuar qarkullimin dhe ka cenuar të drejtën për ushtrim të veprimtarisë.
“Zbatimi i kësaj dispozite po shkel të drejtën e garantuar të pronës, siç përcaktohet në Nenin 46 të Kushtetutës së Kosovës. Pronari i automjetit po pengohet në qasjen dhe shfrytëzimin e pronës së tij”, thuhet në reagimin e Dhomës.
Sipas Dhomës, paragrafi 4 i Nenit 89 është futur në mënyrë të pakonsultuar dhe të pakoordinuar në një nen që lidhet ekskluzivisht me ndalesat e parkimit, duke e cilësuar atë si një “kontrabandim normativ” që rrezikon sigurinë ligjore dhe hap rrugën për interpretime të rrezikshme.
DhTIK kërkon që Avokati i Popullit të hetojë këtë çështje si një rast i mundshëm i shkeljes së të drejtave kushtetuese dhe të drejtës për ushtrim të lirë të veprimtarisë ekonomike.
