Shkruan: Drizan ShALA
Rasti i Aleksandar Vlajiq, pjesëtar i Agjencisë Serbe të Inteligjencës (BIA) dhe personi i parë i dënuar për spiunazh në Republikën e Kosovës që nga shpallja e pavarësisë, përbën një ndër rastet më serioze të infiltrimit të drejtuar nga një agjenci e huaj në institucionet dhe misionet ndërkombëtare të sigurisë në Kosovë.
Ky rast është zbardhur me sukses të plotë nga Agjencia Kosovare e Inteligjencës (AKI), e cila ka udhëhequr një operacion kompleks të kundërzbulimit, duke identifikuar, dokumentuar dhe çmontuar një rrjet të sofistikuar të spiunazhit serb të përfshirë në OSBE, EULEX, UNMIK dhe KFOR.
Përmes teknikave të avancuara të hetimit inteligjent dhe bashkëpunimit të ngushtë me Prokurorinë Speciale dhe institucionet e rendit, AKI ka mundur të:
Dokumentojë rekrutimin nga Vlajiq të punonjëses së OSBE-së, Jelena Gjukanoviq, e cila ka shpërndarë informacion të klasifikuar dhe raporte të brendshme nga misioni ku shërbente;
Identifikojë përdorimin e më shumë se shtatë numrave të ndryshëm telefoni për të shmangur gjurmimin dhe për të maskuar komunikimin me agjentë të infiltruar;
Zbulojë një rrjet më të gjerë operativ të rekrutuar nga BIA, përfshirë individë të komunitetit serb që punonin në misione ndërkombëtare si EULEX, UNMIK dhe KFOR – konkretisht, Martin, Nenad Kalaba dhe Nikita 64;
Përgjojë komunikimet ku BIA përshkruhej si “firma”, ndërsa agjentët dërgonin fotografi të dokumenteve të brendshme të OSBE-së për përdorim nga strukturat e inteligjencës serbe;
Konfirmojë përmes dëshmive elektronike dhe përmbajtjes së pajisjeve të sekuestruara se Vlajiq jo vetëm rekrutonte por edhe nxitte për sulme terroriste në veri, duke përmendur konkretisht modelin e IRA-së dhe duke referuar praninë e armatosur në zonë.
️ Ky operacion përfaqëson një arritje të madhe strategjike për sigurinë kombëtare të Kosovës, duke ndaluar në kohë një rrjet i cili synonte të minonte integritetin e institucioneve shtetërore dhe të prishte balancën e sigurisë në terren përmes manipulimit dhe keqpërdorimit të burimeve ndërkombëtare.
️ AKI, në këtë rast, ka dëshmuar jo vetëm aftësi të avancuara profesionale në fushën e kundërzbulimit, por edhe rol thelbësor në mbrojtjen e sovranitetit institucional të Republikës së Kosovës, përballë një operacioni të koordinuar dhe të mbështetur nga struktura shtetërore të Serbisë.
Ky rast duhet të shërbejë si pikë kthese për rishikimin e standardeve të sigurisë në strukturat ndërkombëtare në Kosovë, si dhe për forcimin e partneritetit ndërinstitucional në fushën e inteligjencës dhe mbrojtjes kombëtare. Rasti Vlajiq nuk është vetëm një fitore ligjore, por një fitore strategjike e shtetit të Kosovës në luftën kundër infiltrimit dhe ndikimit të inteligjencës së huaj.
