Presidenti i Serbisë, Aleksandar Vuçiq, bëri të ditur se në Beograd është takuar me ushtruesin e detyrës së ndihmës sekretarit të shtetit të SHBA-së, Brendan Hanrahan, me të cilin ka biseduar për marrëdhëniet bilaterale, çështjet globale dhe situatën në rajonin e Ballkanit Perëndimor.
Siç njoftoi përmes llogarisë së tij në Instagram, gjatë bisedës është kushtuar vëmendje e veçantë partneritetit strategjik ndërmjet Serbisë dhe Shteteve të Bashkuara, si dhe avancimit të bashkëpunimit në fusha të ndryshme, nga energjetika deri te inteligjenca artificiale.
“Bashkëpunimi ekonomik produktiv duhet të jetë themeli i marrëdhënieve ndërmjet vendeve tona”, theksoi Vuçiq.
Ai shtoi se Serbia mbetet e përkushtuar ndaj ruajtjes së paqes dhe stabilitetit, zgjidhjes së çështjeve të hapura përmes dialogut dhe respektimit të së drejtës ndërkombëtare.
“U pajtuam se komunikimi i hapur dhe i drejtpërdrejtë është kyç për forcimin e mirëkuptimit dhe ndërtimin e besimit të ndërsjellë”, deklaroi presidenti serb.
Vuçiq falënderoi Shtetet e Bashkuara për mbështetjen e vazhdueshme në rrugën evropiane të Serbisë dhe shprehu gatishmërinë e Beogradit për të vazhduar punën në avancimin e mëtejmë të marrëdhënieve, me respekt të plotë për interesat kombëtare dhe shtetërore.
Diplomati amerikan Brendan Hanrahan, para ardhjes në Beograd, kishte paralajmëruar vizitën në rajon. Në rrjetin X, ai shkroi se gjatë kësaj jave do të vizitojë Bosnjën e Hercegovinën, Serbinë dhe Kosovën, pas, siç u shpreh, bisedave produktive në Dejton dhe Uashington.
“Bëhet fjalë për një përvjetor të rëndësishëm dhe një moment vendimtar për Ballkanin Perëndimor. Jam i entuziazmuar për forcimin e lidhjeve ndërmjet SHBA-së dhe vendeve të rajonit”, theksoi Hanrahan.
Ndryshe, ky takim nuk ishte paralajmëruar më parë në media, përveç postimeve në rrjetet sociale. Për momentin, nuk ka njoftime për takime të tjera eventuale.
