Në prag të fillimit të seancës konstituive të Kuvendit të Kosovës, përkatësisht në përpjekjen e 46-të për konstituimin e legjislaturës së nëntë, përfaqësueset e partive parlamentare kanë dhënë deklarata me qëndrime të kundërta sa i përket përgjegjësisë për bllokadën institucionale që po zgjat tashmë prej disa muajsh.
Deputetja e Lëvizjes Vetëvendosje, Albulena Haxhiu, para nisjes së seancës tha se çelësi i zhbllokimit të situatës është në duart e opozitës. Ajo u shpreh se nëse partitë opozitare nuk ndryshojnë qëndrimin e tyre, atëherë nuk pritet të ketë lëvizje as sot.
“Varet nëse opozita ka ndryshuar qëndrimin, natyrisht që mund të ketë ndryshime. Nëse jo, situatën e kemi fatkeqësisht të njëjtë”, deklaroi Haxhiu për media.
Në anën tjetër, deputetja e Partisë Demokratike të Kosovës, Blerta Deliu-Kodra, fajësoi Lëvizjen Vetëvendosje për gjendjen aktuale, duke e akuzuar për “pengmarrje të institucioneve”. Ajo kërkoi reflektim nga partia që ka marrë numrin më të madh të votave në zgjedhjet e fundit, duke thënë se vetëm përmes fleksibilitetit politik mund të zhbllokohet Kuvendi.
“Reflektimi duhet të bëhet nga partia që ka marrë numrin më të madh të mandateve. Nuk pres që të ketë ndryshim për shkak të pengmarrjes që po ndodhë për kaq kohë”, deklaroi Deliu-Kodra.
