Policia e Kosovës, përkatësisht Drejtoria për Hetimin e Trafikimit me Njerëz, ka bërë publike rezultatet e planit operativ “Pranvera 2025”, i realizuar gjatë periudhës 2 qershor deri më 7 korrik të këtij viti në kuadër të aktiviteteve të përbashkëta ndërkombëtare të EMPACT – JAD SEE, me pjesëmarrjen e shteteve si Kosova, Tailanda, Vietnami, Kolumbia, Brazili, Finlanda, Gjermania, Islanda, Greqia, Sllovenia, si dhe përfaqësuesve të EUROPOL, INTERPOL, FRONTEX dhe EU4FAST.
Sipas njoftimit, gjatë këtij plani janë realizuar aktivitete në terren që përfshijnë operacione në rrugë, qendra tregtare, lokale muzikore dhe qendra masazhi, me fokus në identifikimin e viktimave të mundshme të trafikimit dhe parandalimin e formave të tjera të shfrytëzimit.
Policia ka bërë të ditur se rezultatet kryesore të planit operativ “Pranvera 2025” janë inspektimi i 47 lokaleve muzikore në mbarë Kosovën me 482 persona të kontrolluar prej tyre 352 femra dhe 130 meshkuj, 204 shtetas të Kosovës dhe 278 shtetas të huaj (264 nga Shqipëria, 8 nga Serbia, 5 Maqedonia e Veriut, 1 nga Mali i Zi), 8 lokale u mbyllën për shkelje administrative nga MINT, Inspektimi i 67 qendrave të masazhit (149 persona të kontrolluar (114 femra, 35 meshkuj),113 shtetas të Kosovës dhe 36 shtetas të huaj (përfshirë nga Shqipëria, Tajlanda, Maqedonia e Veriut dhe Malavia), dhe 22 qendra masazhi u mbyllën për shkelje administrative.
Policia ka njoftuar se ka inicuar edhe 10 raste për veprat penale ‘keqtrajtim apo braktisje e fëmijës’, ku janë arrestuar 10 të dyshuara, prej tyre (5 shtetase kosovare dhe 5 të huaja, janë identifikuar 15 fëmijë në rrugë si lëmoshkërkues (8 kosovarë dhe 7 të huaj), si dhe 3 raste të tjera janë referuara për kundërvajtje.
“Policia ka iniciuar 7 raste për “marrje me prostitucion” (eskorta) ku janë arrestuar 14 të dyshuar (7 meshkuj kosovarë dhe 7 femra të huaja nga Kolumbia, Venezuela, Brazili, Turqia). Të gjithë janë dënuar me gjobë dhe janë dëbuar nga territori i Kosovës me ndalim hyrjeje për tre vjet”, thuhet në njoftim.
Tutje bëhet e ditur se gjatë këtij plani operativ është iniciuar edhe një rast për veprën penale ‘shfrytëzim i viktimave të trafikimit’, ku janë arrestuar dhe janë intervistuar 4 shtetas kosovarë si të dyshuar, 1 urdhër për masa të veçanta hetimore ekzekutuar ndaj një shtetasi kosovar për veprën “mundësim ose detyrim në prostitucion”, kurse viktima (femër kosovare) është strehuar në institucion të specializuar.
“Të gjitha punëtoret e hasura në lokalet dhe qendrat e kontrolluara kanë pasur mundësi të deklarohen nëse janë viktima të ndonjë forme të trafikimit, por nuk është evidentuar asnjë rast i tillë. Janë sekuestruar gjithashtu 7 dokumente identifikimi, të cilat janë referuar për verifikim sipas ligjit për të huaj”, thuhet në njoftim.
Policia e Kosovës ka përsëritur se mbetet e përkushtuar në luftën kundër trafikimit me njerëz dhe mbrojtjen e të drejtave të njeriut, duke punuar ngushtë me partnerët vendorë dhe ndërkombëtarë për të parandaluar dhe ndëshkuar çdo formë të shfrytëzimit.
