Me ftesë të presidentit të Letonisë, Edgars Rinkēvičs, presidentja e Kosovës, Vjosa Osmani, ka udhëtuar për një vizitë pune në këtë vend.
Sipas njoftimit nga Presidenca, gjatë kësaj vizite, Osmani do të pritet nga presidenti letonez Edgars Rinkēvičs.
“Përveç takimit tête-à-tête, ajo do të zhvillojë edhe një takim pune me delegacionet përkatëse dhe do të marrë pjesë në drekën e punës të organizuar nga presidenti Rinkēvičs., thuhet në njoftim.
Pas takimeve, të dy presidentët do të mbajnë një konferencë të përbashkët për media, gjatë së cilës presidentja Osmani do t’i dorëzojë presidentit Rinkēvičs medaljen ushtarake presidenciale në nder të kontributit të Forcave Mbrojtëse të Letonisë për paqen dhe sigurinë si pjesë e misionit KFOR”
Gjatë vizitës së saj njëditore, presidentja Osmani do të vizitojë edhe Qendrën e Ekselencës së NATO-s për Komunikim Strategjik (STRATCOM), do të zhvillojë takime me përfaqësues të Odës Ekonomike të Letonisë, si dhe do të marrë pjesë në diskutime me ekspertë dhe akademikë mbi politikat që garantojnë paqe dhe siguri të qëndrueshme.
Në njoftim theksohet se kjo vizitë synon forcimin e mëtejshëm të marrëdhënieve ndërshtetërore mes Kosovës dhe Letonisë, avancimin e bashkëpunimit bilateral në fushat e politikës së jashtme, mbrojtjes dhe sigurisë, ekonomisë, integrimit euroatlantik, si dhe shkëmbimin e përvojave për fuqizimin e institucioneve demokratike.
