Policia bullgare ka zbuluar një ngarkesë kokaine me peshë gati 206 kilogramë në makinën e një diplomati kongolez i cili po përpiqej të hynte në Bullgari nga Turqia.
Lajmi u bë i ditur nga agjencia bullgare e lajmeve BTA.
Kokaina u gjet gjatë një inspektimi doganor të makinës. Ajo ishte e paketuar në 179 pako dhe e fshehur në pesë valixhe midis sendeve personale të diplomatit. Vlera totale e ngarkesës vlerësohet në 22.4 milionë dollarë amerikanë.
Diplomati i ndaluar ishte i akredituar në Belgjikë, kështu që nuk gëzonte imunitet diplomatik në territorin bullgar.
Gjithashtu u raportua se shoferi i makinës, një shtetas bullgar, dhe pasagjeri, një shtetas belg, u ndaluan.
Nëse shpallen fajtorë për kontrabandë droge, ata përballen me deri në 20 vjet burg.
