Dy punëtorë kanë vdekur pasi kanë rënë nga lartësia e një objekti në ndërtim në Gjakovë.
Policia e Kosovës ka bërë të ditur se sot rreth orës 08:15, janë njoftuar për një incident të rëndë në vendin e punës, ku dy persona kanë pësuar lëndime të rënda.
Zëdhënësi i Policisë për rajonin e Gjakovës, Sheremet Elezaj ka konfirmuar për RTKlive se bëhet fjalë për dy meshkuj të moshës madhore, të cilët janë dërguar menjëherë për trajtim mjekësor në Spitalin Rajonal të Gjakovës, pas një incidenti të ndodhur në rrugën “Bardhyl Qaushi”.
“Përkundër përpjekjeve të stafit mjekësor, më pas është konfirmuar se të dy personat kanë ndërruar jetë si pasojë e plagëve të marra”, ka thënë Elezaj .
Ai ka njoftuar se njësitet relevante të Policisë kanë dalë menjëherë në vendin e ngjarjes dhe kanë nisur veprimet hetimore për të sqaruar rrethanat e sakta të rastit.
