Britania dhe më shumë se 20 vende të tjera bënë thirrje të hënën për një përfundim të menjëhershëm të luftës në Gaza.
“U bëjmë thirrje palëve ndërluftuese dhe bashkësisë ndërkombëtare të bashkohen në një dëshirë të përbashkët për t’i dhënë fund këtij konflikti të tmerrshëm përmes një armëpushimi të menjëhershëm, pa kushte dhe të përhershëm… Jemi të bashkuar me një qëllim të thjeshtë dhe urgjent: lufta në Gaza duhet të përfundojë menjëherë”, thuhet në një komunikatë të përbashkët të miratuar në Londër nga ministrat e jashtëm të Britanisë së Madhe, Francës, Italisë, Japonisë, Australisë, Kanadasë, Danimarkës dhe një numri vendesh të tjera perëndimore.
Modeli i qeverisë izraelite për dhënien e ndihmës humanitare për banorët e Gazës u përshkrua në një komunikatë si “i rrezikshëm, që çon në paqëndrueshmëri dhe i privon banorët e Gazës nga dinjiteti i tyre njerëzor”.
“Ne jemi të gatshëm të ndërmarrim veprime të mëtejshme në mbështetje të një armëpushimi të menjëhershëm dhe një rruge politike drejt sigurisë dhe paqes për izraelitët, palestinezët dhe rajonin”, theksohet gjithashtu në komunikatën e cituar nga Reuters.
