Katërvjeçarja Razan Abu Zaher vdiq të dielën në një spital në Gazën qendrore nga ndërlikimet e shkaktuara nga uria dhe kequshqyerja, raporton CNN . Trupi i saj i uritur u gjet në një morg. “Para luftës, ajo ishte plotësisht e shëndetshme, por pas luftës, shëndeti i saj filloi të përkeqësohej për shkak të kequshqyerjes. Ne nuk kemi asgjë për ta forcuar atë”, tha nëna e vajzës, Tahrir Abu Daher.
Sipas Ministrisë Palestineze të Shëndetësisë, të paktën 76 fëmijë dhe dhjetë të rritur kanë vdekur nga kequshqyerja në Gaza që nga fillimi i konfliktit në tetor 2023. Organizata Botërore e Shëndetësisë thotë se shumica e këtyre vdekjeve ndodhën pasi autoritetet izraelite shtrënguan bllokadën në fillim të marsit.
Razan ishte një nga të paktën katër fëmijët që vdiqën në tre ditët e fundit, përfshirë një foshnjë tre muajshe. Gaza ka regjistruar 18 vdekje të lidhura me urinë në 24 orët e fundit, duke reflektuar një krizë humanitare në thellim, sipas ministrisë së shëndetësisë.
“Gaza është në fazën më të keqe të urisë, e cila ka arritur nivele katastrofike mes një heshtjeje të paparë ndërkombëtare”, tha Dr. Khalil Al-Daqran, zëdhënës i Spitalit të Martirëve Al-Aksa. “Fëmijët që po vdesin tani e kanë humbur fëmijërinë e tyre dy herë: së pari nga bombardimet dhe vrasjet, dhe pastaj nga mungesa e ushqimit”, shtoi Dr. Khalil Al-Daqran.
“Qindra njerëz, trupat e të cilëve janë dobësuar rëndë, tani janë në rrezik të menjëhershëm vdekjeje për shkak të urisë dhe pamundësisë për të vazhduar mbijetesën”, tha Ministria Palestineze e Shëndetësisë. “Fytyrat tona po ndryshojnë, trupat tanë po tkurren. Jemi të panjohshëm nga lodhja, sikur po veniten dhe po vdesim ngadalë”, tha një anëtar i ekipit të Qendrës Palestineze për të Drejtat e Njeriut nga Gaza.
“Njerëzit po vijnë me nevojë të madhe për ushqim në vend të ilaçeve, sepse trupat e tyre janë në kufirin e qëndrueshmërisë dhe të gjithë janë në rrezik vdekjeje”, tha Dr. Suhaib Al-Hams, drejtor i Spitalit të Kuvajtit në Khan Younis.
Apele dhe dëshmi nga mjekë dhe humanitarë rreth situatës katastrofike në Gaza
“Ne shpërndamë 80,000 vakte të shtunën, duke përdorur furnizimet e fundit. Kamionët me ndihma ende presin në kufi. Kjo është hera e dytë që na është dashur të ndërpresim punën për shkak të mungesës së aksesit në ndihmë”, tha organizata World Central Kitchen.
“Një numër i madh civilësh dhe personeli mjekësor po mbërrijnë pa ndjenja për shkak të kequshqyerjes së rëndë”, tha Dr. Mohammed Abu Salmiya, drejtor i Spitalit Al-Shifa. “Ushqimi po mbaron në Gaza. Ata që përpiqen ta gjejnë atë rrezikojnë të qëllohen. Njerëzit po vdesin duke u përpjekur të ushqejnë familjet e tyre”, tha Tom Fletcher, koordinatori i ndihmës emergjente të OKB-së.
