Kryetarja e Alternativës, Mimoza Kusari -Lila, parti që është në koalicion me Lëvizjen Vetëvendosje, u ka bërë thirrje partive politike që të kapërcejnë ngërçin në mënyrë që Kosova të ketë institucionet e reja.
“Subjekte të caktuara fatkeqësisht kanë vendosur që një obligim kushtetues të marrin si një veprim politik. Ju bëj thirrje të gjitha partive pa dallim që ta ulin tonin e polarizimit e ndasive që po mundohen të ushqejnë në Kuvendin e Kosovës, të marrin pjesë në votim sipas vullnetit të tyre dhe të kapërcejnë këtë ngërç që po i kushton vendit dhe qytetarëve. Më e rrezikshmja sot se çkado tjetër nga jashtë, është humbja e besimit nga brenda”, tha Kusari-Lila në konferencë për media me rastin e shënimit të 8 vjetorit të themelimit të Alternativës si subjekt politik.
Ajo ka treguar se partia që u themelua në vitin 2017, këtë vit në zgjedhje lokale do të garojë në 6 komuna me listë për Asamble Komunale e në tri prej tyre edhe me kandidat për kryetar.
“Për asamble do të kandidojë në Prishtinë, në Gjakovë, Pejë, Prizren, Mitrovicë të Jugut e Mitrovicë të Veriut. Po punojnë në shtrirjen e Alternativës në Gjilan e Ferizaj”, tha Kusari-Lila.
Përgjatë viteve si subjekt politik, tha ajo, kanë garuar në dy palë zgjedhje lokale e në katër palë zgjedhje nacionale.
“Në vitin 2017 aty ku kemi qenë me logon dhe përfaqësimin tonë të drejtpërdrejt e në vitin 2021 kemi garuar me Vetëvendosjen. Gjithashtu gjatë këtyre viteve kemi garuar edhe në 4 palë zgjedhje qendrore, ato në vitin 2017 në koalicion me LDK-në, e në 2019, 2021 dhe 2025 me LVV-në”, tha ajo.
Kusari-Lila ka shpalosur objektivat programore të Alternativës, derisa ka treguar se ceremonia finale do të jetë të premten për ku do të shënohet 8 vjetori i themelimit si subjekt politik.
