Shkruan: Gurakuç KUÇI – Hulumtuesi i Lartë në Institutin për Studime të Luftës Hibride “OCTOPUS”
Drejtori i Zyrës për “Kosovë dhe Metohi”, Petar Petkovic, njoftoi se nga vjeshta 2025 do të ofrohen ndihma të reja financiare për serbët në Kosovë, nën pretekstin e një skeme sociale. Kjo skemë pritet të nisë pikërisht para zgjedhjeve lokale për komunat në Republikën e Kosovës, një manovër që përkon me modelet e mëparshme të përdorura nga Serbia para zgjedhjeve parlamentare të shkurtit 2025.
Petkovic deklaroi:
“Përveç ndihmës që u japim njerëzve tanë në fillim të vitit, dhe vëmendjes së veçantë ndaj më të cenueshmëve socialë, dhe ndarjes së 20.000 dinarëve për 5.000 persona çdo muaj, ne po prezantojmë një masë tjetër të tillë duke filluar nga vjeshta. Do të ofrojmë një ndihmë mujore prej 20.000 dinarësh për 5.000 persona të tjerë në Kosovë dhe Metohi.”
Si funksionon skema?
– Pagesat shpërndahen për persona të përzgjedhur nëpër familje që përfshijnë sa më gjerë masën serbe.
– Pagesat mujore lidhen drejtpërdrejt me përfshirjen në aktivitete politike, pjesëmarrjen në votime dhe mobilizimin e të tjerëve.
– Kush nuk ndjek direktivat e Beogradit rrezikon ta humbë pagesën, të përjashtohet nga punësimi në institucionet paralele, apo të përballet me frikësim e stigmatizim si “tradhtar”.
– Fondet shpërndahen përmes Zyrës për “Kosovë dhe Metohi”, me urdhër politik nga presidenca serbe dhe kontroll të drejtpërdrejtë nga Aleksandar Vucic.
Serbia e përdor ndihmën sociale si instrument presioni politik, për ta mbajtur komunitetin serb të Kosovës të varur nga Beogradi dhe për ta detyruar që të votojë për Listën Serbe, një subjekt i vetëm me monopol politik dhe lojalitet total ndaj Vucicit, jo ndaj demokracisë.
Kjo nuk është thjesht ndërhyrje, është një komponent i strategjisë hibride të Beogradit për të ruajtur ndikimin e vet në Kosovë.
Skema është e përsëritur dhe e dokumentuar: është përdorur në çdo cikël zgjedhor në forma të ndryshme që nga viti 2013, gjithmonë me fonde shtetërore, gjithmonë për të ruajtur kontrollin elektoral mbi territorin e Kosovës dhe për të sabotuar integrimin institucional të komunitetit serb në kuadër të Republikës së Kosovës.
Nëse duam zgjedhje të lira dhe të ndershme në Kosovë kjo skemë duhet të ndalet. Komuniteti ndërkombëtarët nuk mund ta normalizojnë më këtë formë të blerjes së demokracisë.
