Në dy raste të ndara gjatë ditës së djeshme, Policia e Kosovës në kuadër të Drejtorisë Rajonale në Gjakovë ka sekuestruar dy armë zjarri të mbajtura pa leje dhe ka arrestuar dy persona të dyshuar.
Policia përmes një komunikate ka njoftuar se rasti i parë ndodhi rreth orës 20:50 në Gjakovë, ku Njësia për Reagim të Shpejtë ndaloi një automjet me targa vendore në rrugën “Gjergj Sokoli”. Gjatë kontrollit, tek shoferi është gjetur një armë e llojit revolver me 7 fishekë dhe 5 gëzhoja. I dyshuari nuk posedonte leje për armën dhe është arrestuar në vendin e ngjarjes.
Rasti i dytë është raportuar në orët e paradites në Malishevë, pas një informate për të shtëna me armë në rrugën “Idriz Ajeti”. Policia ka reaguar menjëherë dhe, në konsultim me prokurorin, ka kryer kontroll në banesën e një të dyshuari të mitur. Aty është gjetur një pistoletë për sinjalizim me zë, një karikator dhe 5 gëzhoja, të cilat janë konfiskuar si prova materiale.
Në të dy rastet, personat e dyshuar janë liruar në procedurë të rregullt me vendim të Prokurorit të Shtetit, ndërsa janë iniciuar procedura penale për veprën penale “Mbajtje në pronësi dhe kontroll të paautorizuar të armëve”.
Policia e Kosovës thekson përkushtimin për garantimin e rendit dhe sigurisë publike, si dhe parandalimin e çdo aktiviteti të paligjshëm që rrezikon jetën dhe pronën e qytetarëve.
