Gjykata Themelore në Prishtinë ka shpallur aktgjykimin për rastin e sulmit terrorist ndaj zyrave të Komisionit Komunal Zgjedhor në Mitrovicën e Veriut, në dhjetor të vitit 2022.
Të akuzuarit për këtë sulm: Millun Millenkoviq e Aleksandar Vllajiq janë dënuar me 5 vjet burg, kurse Dejan Pantiq me 2 vjet, ndërkohë Miomir Vakiq, është liruar nga akuzat.
Të akuzuarit Millun Millenkoviq dhe Aleksandër Vllajiq, kanë kërkuar nga trupi gjykues që të mos jenë prezentë në shpallje të aktgjykimit, me arsyetimin e temperaturave të larta që mbizotërojnë brenda sallave në Pallatin e Drejtësisë.
Bazuar në aktakuzën e Prokurorisë Speciale, më 6 dhjetor të 2022-tës është kryer sulm terrorist ndaj zyrave të KKZ-së në Mitrovicë të Veriut dhe një autoambulancë është përdorur për bartjen e granatave të dorës. Sipas aktakuzës, granatat i ka marrë i akuzuari Millun Millenkoviq, i cili gjatë paraqitjes së fjalës përfundimtare të tij në seancën paraprake gjyqësore i ka mohuar akuzat.
Ndërkaq, Aleksandar Vllajiq, Dejan Pantiq dhe Miomir Vakiq janë të akuzuar se kanë hedhur granata dore dhe shok bomba me qëllim të detyrimit të organeve publike të Kosovës për t’u tërhequr nga organizimi i zgjedhjeve në veriun e banuar kryesisht me serbë.
