Presidentja Vjosa Osmani ka shprehur solidarizimin me viktimat e vazhdueshme në Gaza e veçanërisht fëmijët. Ajo ka shprehur mbështetjen e saj për armëpushimin atje.
“Fëmijët nuk fillojnë kurrë luftëra! Por ata janë ata që vuajnë më shumë dhe mbajnë pasojat më të mëdha të çdo konflikti. Katastrofa humanitare në Gaza dhe vuajtjet e civilëve të pafajshëm, veçanërisht fëmijëve, është zemërthyese dhe duhet të marrë fund. Çdo fëmijë, çdo familje, pavarësisht kombësisë apo fesë, është e çmuar dhe duhet të mbrohet”, ka shkruar ajo.
Osmani ka thënë se mbështesin armëpushimin e udhëhequr nga Shtetet e Bashkuara, Katari dhe Egjipti, duke përfshirë përpjekjet për lirimin e menjëhershëm të të gjithë pengjeve.
“Kosova vazhdon të mbështesë përpjekjet ndërkombëtare që synojnë arritjen e një të ardhmeje të drejtë, të qëndrueshme dhe paqësore, ku si izraelitët ashtu edhe palestinezët mund të jetojnë me dinjitet, siguri dhe respekt të ndërsjellë, me një angazhim të përbashkët për mbrojtjen e jetës njerëzore”, ka shkruar Osmani.
