Ngjarja e ndodhur dy ditë më parë në qytetin e Vlorës, kur një ish oficer policie dhunon nje gjimnazist kamarier dhe më pas vetë pëson fatin e të dhunuarit, përbën një rast flagrant të mosfunksionimit të sigurisë së individit në mjediset tona urbane, sikundër edhe i triumfit të vetëgjyqësisë nga individë të ndryshëm.
Unioni i Gazetarëve Shqiptarë është i alarmuar nga denoncimi i reporterit Enrik Mehmeti, njëherësh kryetar i UGSH për qarkun Vlorë, sipas të cilit, persona me uniformë dhe drejtues të policisë vendore kanë intimiduar kolegun, duke këmbëngulur verbalisht për mospublikimin e imazheve të dhunës së ushtruar mbi gjimnazistin kamarier.
Në njoftimin zyrtar të Policisë së Shtetit, bëhet publike se në përfundim të veprimeve hetimore të kryera nga Prokuroria e Rrethit Gjyqësor Vlorë, gazetari Enrik Mehmeti procedohet për veprën penale “ Plagosje e lehtë me dashje”.
Ky procedim e implikon gazetarin dhe e trajton atë si pjesë të subjektit të ndodhur dhe për të cilin vazhdojnë hetimet.
UGSH kërkon në mënyrë të menjëhershme sqarimin e të gjitha rrethanave të ngjarjes dhe të pozicionit të kolegut në këtë ndodhi. Ne kërkojmë me këmbëngulje marrjen në konsideratë të denoncimit të kolegut për tentativë intimidimi nga zyrtari i policisë vendore. Trajtimin me shumë përgjegjësi të rastit dhe statusit profesional të gazetarit Mehmeti dhe ndricimin e plotë të të gjithë ndodhisë e cila ka shkaktuar ndjeshmërinë e lartë publike.
Shprehim solidaritetin e plotë me kolegët në detyrë, sidomos ndaj të gjithë kurajozëve që raportojnë në mbrojtje të të vërtetave dhe sidomos në solidaritet të përhershëm me të drejtat qytetare e ligjore.
