Presidenti i Republikës së Turqisë, Rexhep Tajip Erdogan, tha të martën se në Rripin e Gazës, i cili ka qenë nën bllokadë dhe sulme të vazhdueshme izraelite për 22 muaj, po kryhet gjenocid kundër popullit palestinez, duke përdorur urinë dhe etjen si armë.
“Shteti terrorist i Izraelit ka kryer gjenocid kundër vëllezërve tanë në Gaza për 22 muaj, duke i masakruar brutalisht në një sipërfaqe prej 360 kilometrash katrorë. Përdorimi i urisë si armë nga Izraeli kundër palestinezëve është prova më e qartë se ata nuk kanë aspak njerëzillëk. Nga Gaza vijnë imazhe që janë edhe më të këqija, më brutale dhe çnjerëzore se ato nga kampet naziste. Njerëzit po vdesin nga uria dhe etja para syve të të gjithë botës”, tha Erdogan.
Ai i bëri këto deklarata gjatë një konference të përbashkët për shtyp me Presidentin e Kazakistanit Kasim-Zhomart Tokaev në Ankara.
Presidenti turk përsëriti se bashkësia ndërkombëtare nuk duhet të mbyllë më sytë ndaj vuajtjeve të palestinezëve dhe tha se, herët a vonë, të gjithë ata që janë përgjegjës për gjenocidin në Gaza do të duhet të përgjigjen para ligjit dhe historisë.
“Shpresojmë të shohim ditën kur ata që kryen gjenocid kundër popullit të Gazës do të mbahen përgjegjës para ligjit dhe historisë. Ajo që po ndodh nuk është vetëm një katastrofë humanitare, por një politikë e vetëdijshme, sistematike dhe monstruoze e shfarosjes së një populli të tërë”, tha Erdogan.
Që nga fillimi i ofensivës izraelite në Gaza, Turqia ka qenë ndër kritikët më të zëshëm të veprimeve izraelite dhe Presidenti Erdogan e ka akuzuar vazhdimisht qeverinë izraelite për krime lufte, ndëshkim kolektiv dhe spastrim etnik.
