Lidhur me vendimin e ZRRE-së për dalje në treg të hapur të energjisë për biznese, deputeti Avdullah Hoti ka thënë se ka krijuar pasiguri të madhe për furnizim me energji për bizneset.
Hoti konsideron se do të duhej të mbaheshin konsultime e të bëheshin shumë përgatitje dhe se vendimi do të duhej të dakordohej me komunitetin e bizneseve, duke shtuar se pasojat do të jenë të mëdha duke nisur nga largimi i investitorëve ekzistues vendorë e ndërkombëtarë.
“Pasojat do të jenë të mëdha: largim i investitorëve ekzistues vendorë e ndërkombëtarë, mosardhje e investitorëve të rinj, mungesë e investimeve vendore, rritje e kostove të bizneseve vendore, humbje e aftësisë konkurruese të produkteve vendore në tregun e brendshëm dhe të jashtëm, shtrenjtim i kostos së jetesës për qytetarë, rritje e papunësisë. Si rezultat, brenda një kohe të shkurtër do të vërejmë përkeqësim të bilancit tregtar, pasi produktet e huaja do të vërshojnë tregun tonë”, shkruan Hoti në Facebook.
Hoti tutje ka thënë se kjo qasje arbitrare e ZRRE-së, e mbështetur nga Qeveria e mashtrimit, vetëm bizneseve kosovare nuk u shërben.
