Kryetari i Bashkimit Demokratik për Integrim, Ali Ahmeti ka thënë se mbështetë protestën e thirrur nga kategoritë e dala nga lufta e UÇK-së, më 7 gusht në Prishtinë.
Ai ka shkruar se drejtësia për popullin shqiptar nuk mund të bazohet në procese politike të imponuara nga Rusia dhe “dëshmi” të servuara nga Serbia.
“Lufta e popullit shqiptar e prirë nga Ushtria Çlirimtare e Kosovës ishte e drejtë, e duhur dhe e përkrahur nga gjithë bota demokratike dhe liridashëse. Që nga paslufta, panumër procese gjyqësore ndërkombëtare e vendore dëshmuan çiltërsinë e luftës sonë për liri, demokraci, pavarësi. Drejtësia për popullin shqiptar nuk mund të bazohet në procese politike të imponuara nga Rusia dhe “dëshmi” të servuara nga Serbia. Unë jam pjesë e pandarë e luftës për liri të kombit tim dhe e mbështes protestën e ftuar nga organizatat e dala nga lufta e UÇK-së”, ka shkruar Ahmeti.
Ahmeti u ka bërë thirrje të gjithëve, t’i bashkohen protestës.
“Ju ftoj të gjithëve që të shihemi bashkë më 7 gusht, në orën 17:00, në sheshin “Skënderbeu” në Prishtinë, në mbështetje të lirisë sonë”, shkroi Ahmeti.
Organizatat e dala nga lufta e Ushtrisë Çlirimtare të Kosovës kanë thirrur protestë për të enjten e javës që vjen, më 7 gusht, kundër padrejtësive, siç kanë thënë ata, që po i bëhen ish-krerëve të UÇK-së që po gjykohen në Hagë.
Mbështetje protestës i kanë dhënë liderë të disa partive politike në Kosovë.
