Gjashtë persona të tjerë në Rripin e Gazës kanë vdekur nga uria dhe kequshqyerja në 24 orët e fundit, tha të hënën ministria e shëndetësisë e enklavës palestineze. Vdekjet e reja e çojnë numrin e të vdekurve në 175, përfshirë 93 fëmijë, tha ministria. Televizioni egjiptian Al Kahira News raportoi më parë se dy kamionë që transportonin 107 ton karburant do të hynin në Gaza.
Ministria e Shëndetësisë e Gazës paralajmëron se mungesa e karburantit ka kompromentuar ndjeshëm funksionimin e spitaleve, që do të thotë se mjekët mund të trajtojnë vetëm të sëmurët rëndë dhe të plagosurit. Ende nuk është konfirmuar nëse kamionët e njoftuar kanë hyrë në Gaza.
Furnizimet me karburant në enklavë kanë qenë të rralla që nga marsi, kur Izraeli kufizoi aksesin në mallra dhe ndihmë humanitare, duke pretenduar se po ushtronte presion mbi militantët e Hamasit për të liruar pengjet e mbetura izraelite që i rrëmbyen më 7 tetor 2023.
Izraeli fajëson Hamasin për vuajtjet në Gaza, por pas presionit në rritje nga bashkësia ndërkombëtare, njoftoi hapa javën e kaluar për të dërguar ndihma për popullsinë e enklavës, duke përfshirë ndërprerjen e luftimeve në disa pjesë të Rripit të Gazës, autorizimin e dërgimit të ndihmës nga ajri dhe mbrojtjen e disa rrugëve për konvojet humanitare.
Kombet e Bashkuara paralajmërojnë se dërgimi i ndihmës nga ajri nuk është i mjaftueshëm dhe se Izraeli duhet të lejojë akses shumë më të madh nga toka. Zyra e medias e qeverisë në Gaza njoftoi sot se që nga lehtësimi i kufizimeve në korrik, pothuajse 1,600 kamionë me ndihma kanë hyrë në enklavë. Dëshmitarët dhe burimet e Hamasit pohojnë se shumë prej tyre janë vjedhur nga bandat e armatosura dhe banorët e uritur.
Autoritetet palestineze thonë se të paktën 40 persona u vranë sot në sulmet ajrore në të gjithë enklavën. Midis të vdekurve ishin edhe njerëz që përpiqeshin të arrinin në qendrat e shpërndarjes së ndihmave, thanë zyrtarët e shëndetësisë. Një punonjës i Gjysmëhënës së Kuqe Palestineze u vra gjithashtu. Organizata e ndihmës tha se kati i parë i ndërtesës së saj u vu në flakë në një sulm ajror në selinë e saj në Khan Yunis.
