Ministrinë e Arsimit, Shkencës, Teknologjisë dhe Inovacionit ka bërë të ditur se Kosova është pranuar zyrtarisht si anëtare e Aleancës Evropiane për Praktikën Profesionale / Arsimin Dual (European Alliance for Apprenticeships – EAfA), duke u bërë vendi i 43-të që i bashkohet kësaj platforme prestigjioze evropiane.
Ky anëtarësim përfaqëson një arritje të rëndësishme për Ministrinë e Arsimit, Shkencës, Teknologjisë dhe Inovacionit (MASHTI), dhe vjen si rezultat i përkushtimit për fuqizimin e arsimit profesional dhe përafrimin e tij me nevojat e tregut të punës.
Përmes kësaj platforme, Kosova do të angazhohet në:
përfshirjen aktive të sektorit privat;
zgjerimin e ofrimit të arsimit dual në bashkëpunim të ngushtë me bizneset;
integrimin e arsimit dual në programet e aftësimit të të rriturve;
krijimin dhe funksionimin e Këshillave Sektoriale të Shkathtësive;
përmirësimin e qeverisjes së shkollave profesionale.
Sipas kësaj ministrie, anëtarësimi në EAfA i mundëson Kosovës të ftojë për anëtarësim edhe institucione të tjera kombëtare si odat ekonomike, shoqatat sektoriale dhe partnerët socialë. Po ashtu, hap mundësi për bashkëpunim me shtete të tjera në zhvillimin e praktikave të avancuara të arsimit profesional, mobilitetin e praktikantëve dhe krijimin e partneriteteve me kompani, organizata rinore dhe institucione edukative nga e gjithë Evropa.
EAfA është një platformë gjithëpërfshirëse që promovon praktika profesionale cilësore, mbështetje për ndërmarrjet e vogla dhe të mesme, pjesëmarrjen aktive të praktikantëve dhe përfshirjen e autoriteteve vendore.
“Ky është një hap i rëndësishëm drejt ndërtimit të një sistemi të fortë dhe modern të arsimit profesional që përgatit të rinjtë për tregun e punës. Me anëtarësimin në EAfA, Kosova pozicionohet si një vend që synon cilësinë dhe standardet evropiane në edukim dhe zhvillim profesional”, thuhet në njoftimin e MASHTI-t.
Ministria bën të ditur se anëtarësimi është rezultat i përmbushjes së suksesshme të standardeve të kërkuara nga kjo platformë, pas një procesi të përkushtuar pune dhe koordinimi.
