Unioni i Gazetarëve Shqiptarë (UGSH) ka shprehur shqetësimin ndaj krizës financiare dhe institucionale në dy mediat publike kryesore të hapësirës shqiptare, Radio Televizionin Publik Shqiptar (RTPSH) dhe Radio Televizionin e Kosovës (RTK).
Në një deklaratë publike, UGSH thekson se RTK po përballet me një krizë të paprecedentë, duke e cilësuar mungesën e financimit nga Kuvendi dhe Qeveria në detyrë si papërgjegjshmëri politike që kërcënon ekzistencën e vetme të një mediumi publik në Kosovë.
“Gazetarët dhe rreth 700 punonjës të RTK-së përballen si asnjëherë më parë me mungesën e financimit nga institucionet shtetërore, duke rrezikuar funksionimin normal të medias publike”, thuhet në deklaratë.
UGSH kërkon ndërhyrje të menjëhershme nga institucionet e Kosovës për të zgjidhur krizën dhe për të garantuar informimin publik si detyrim kushtetues dhe demokratik.
“Institucioni i medias publike, i themeluar me ligj të Republikës së Kosovës, urgjentisht duhet të ndërhyhet për të garantuar opcionin legjitim të informimit publik prej mediumit të vetëm publik që është RTK”, thuhet më tej.
Sipas UGSH, reagimet e shumta ndërkombëtare në mbështetje të RTK-së janë tregues i rëndësisë së krizës dhe ndikimit që ajo ka në imazhin funksional të shtetit të Kosovës.
Unioni paralajmëron se përkimi i krizës në RTK dhe RTPSH mund të jetë pjesë e një qëllimi politik për t’i shndërruar mediat publike në media shtetërore dhe të politizuara, duke kërkuar edhe ndërhyrjen e organizmave ndërkombëtarë që mbrojnë lirinë e informimit dhe pavarësinë e mediave publike në vendet që synojnë integrimin evropian.
Deklarata përfundon me shprehjen e solidaritetit të plotë me gazetarët dhe punonjësit e RTK-së, ndërsa theksohet se mbrojtja e medias publike është mbrojtje e të drejtës qytetare për informim të pavarur dhe të besueshëm.
