Presidentja, Vjosa Osmani ka kundërshtuar caktimin e gjyqtarit Radomir Laban, nga Gjykata Kushtetuese për të vendosur lidhur me rendin kushtetues të Kosovës, në cilësinë e gjyqtarit raportues.
“Kam tërhequr kërkesën të paraqitur në Gjykatë më 22 korrik 2025. Këtë e kam bërë si reagim të menjëhershëm pas informatës së konfirmuar se si gjyqtar raportues në këtë kërkesë është caktuar gjyqtari Radomir Laban, për veprimtarinë e rrezikshme të të cilit gjatë viteve 2018, 2021 dhe 2024 institucionet tona të sigurisë kanë dorëzuar informacione të qarta dhe zyrtare”, ka thënë Osmani në konference për media.
Osmani ka thënë se pikërisht bazuar në informacionet e sigurisë, Ministria e Drejtësisë kishte refuzuar ta emëronte noter Laban. Ajo ka thënë se caktimi i tij është shqetësues dhe i rrezikshëm, meqë sipas saj, vendimet e tij mund të kenë pasoja për të ardhmen.
“Gjyqtari raportues e trason rrugën e një rasti, rrugë që kjo ndiqet pastaj nga gjykata në pothuajse të gjitha rastet. Në bazë të rregullores, përkundër praktikës së ndarjes së balancuar të rasteve mes gjyqtarëve, kryetari i Gjykatës Kushtetuese ka diskrecion të plotë të vendosë se cili rast i caktohet cilit gjyqtar. Kërkesa jonë ka të bëjë me çështje thelbësore për rendin kushtetues, prandaj është thellësisht shqetësuese se si një gjyqtar për të cilin institucionet tona të sigurisë kanë dorëzuar informata zyrtarisht se rrezikon shtetin tonë, t’i lihet në dorë ta përcaktojë fatin e rendit tonë kushtetues”, ka thënë ajo.
“Tërheqja e kësaj kërkese është veprim i domosdoshëm në funksion të mbrojtjes së rendit kushtetues. Është absurde të pritet që rendi ynë kushtetues të mbrohet nga persona, që sipas institucioneve të sigurisë, e rrezikojnë rendin kushtetues”, ka shtuar Osmani.
Për Laban, një vit më parë Presidenca e Kosovës, kishte raportuar se po e cenon sigurinë kombëtare e rendin kushtetues të Kosovës.
