Një samit midis presidentit rus Vladimir Putin dhe presidentit të SHBA-së Donald Trump pritet të mbahet “në ditët në vijim” me “propozimin e palës amerikane”, tha këshilltari presidencial rus Yuri Ushakov, i cituar nga agjencia e lajmeve Interfax.
“Me propozimin e palës amerikane, në thelb është rënë dakord për një takim dypalësh të nivelit të lartë në ditët në vijim, përkatësisht një takim midis Presidentit Vladimir Putin dhe Donald Trump”, tha Ushakov. “Tani, së bashku me kolegët tanë amerikanë, po fillojmë përgatitjet konkrete”, shtoi ai.
Ushakov tha se gjatë takimit të djeshëm midis Putinit dhe Steve Witkoff, i dërguari i SHBA-së “la të kuptohej” për mundësinë e një takimi trepalësh midis presidentëve të Rusisë, SHBA-së dhe Ukrainës, por se “pala ruse e la këtë opsion krejtësisht pa koment”, raportoi Tass.
Presidenti ukrainas Volodymyr Zelensky ka kërkuar një takim ballë për ballë me Putinin për t’i dhënë fund luftës, pasi i dërguari i posaçëm i Donald Trump zhvilloi bisedime me udhëheqësin rus në Moskë. “Në Ukrainë, ne kemi thënë vazhdimisht se gjetja e zgjidhjeve konkrete mund të jetë vërtet efektive kur flasim në nivel udhëheqësish. Është e nevojshme të përcaktohet koha e një takimi të tillë dhe gama e çështjeve që do të trajtohen”, shkroi Zelensky në mediat sociale, një ditë pasi foli me presidentin amerikan, i cili tha se mund të takohej me Putinin “shumë shpejt”.
“Sot është një ditë me kontakte të shumta për të bërë përparim konkret në rrugën drejt paqes dhe për të garantuar pavarësinë e Ukrainës: janë planifikuar disa diskutime”, përfshirë “një telefonatë me kancelarin Merz, tashmë e planifikuar. Do të jemi gjithashtu në kontakt me kolegët tanë francezë dhe italianë”, shkroi më vonë udhëheqësi ukrainas në X. “Do të ketë edhe komunikime në nivelin e këshilltarëve të sigurisë kombëtare. Dje, pas bisedës me Trump dhe udhëheqësit evropianë, fola edhe me Sekretarin e Përgjithshëm të NATO-s dhe Presidentin finlandez. Po punojmë së bashku”, shtoi ai.
Zelensky bën thirrje që edhe Evropa të marrë pjesë në bisedimet e paqes midis Rusisë dhe Ukrainës .
“Fola me Volodymyr Zelensky-n rreth zhvillimeve të ditëve të fundit”, shkroi Presidentja e Komisionit të BE-së, Ursula von der Leyen, në X. “ Diskutuam hapat e ardhshëm për të arritur një marrëveshje paqeje të negociuar dhe anëtarësimin e ardhshëm të Ukrainës në Bashkimin Evropian, si dhe rindërtimin e saj. Qëndrimi i Evropës është i qartë. Ne e mbështesim plotësisht Ukrainën. Ne do të vazhdojmë të luajmë një rol aktiv në sigurimin e një paqeje të drejtë dhe të qëndrueshme.”
Sipas gazetës New York Post, duke cituar burime nga Shtëpia e Bardhë, Donald Trump do të takohet me Vladimir Putin vetëm nëse presidenti rus takohet edhe me Volodymyr Zelenskyn. “Putin duhet të takohet me Zelenskyn që të zhvillohet takimi me Trumpin”, i tha një zyrtar i Shtëpisë së Bardhë gazetës New York Post.
Vladimir Putin është planifikuar të takohet me Volodymyr Zelensky përpara një takimi dypalësh me Donald Trump, raporton Politico, duke cituar burime nga Shtëpia e Bardhë. Nuk është e qartë se si një takim i mundshëm ballë për ballë midis Trump dhe Putin do të ndikonte në afatin që presidenti i SHBA-së ka vendosur për vendosjen e sanksioneve të mëtejshme ndaj Rusisë.
Putin: Emiratet janë ndër vendet e përshtatshme për një samit me Trumpin.
Emiratet e Bashkuara Arabe do të ishin ndër vendet “plotësisht të përshtatshme” për të pritur samitin midis Vladimir Putin dhe Donald Trump. Presidenti rus e tha këtë pas një takimi në Kremlin me Presidentin e Emirateve të Bashkuara Arabe, Mohamed bin Zayed Al Nahyan. “Ne kemi shumë miq,” theksoi Putin, “të cilët janë të gatshëm të na ndihmojnë të organizojmë ngjarje të këtij lloji. Një nga këta miq është presidenti i Emirateve të Bashkuara Arabe. Mendoj se do të vendosim, por do të ishte një nga vendet e përshtatshme, plotësisht i përshtatshëm.”
Putin tha se ishte ende “larg krijimit të kushteve për një samit me homologun e tij ukrainas Volodymyr Zelensky”, raporton Tass.
