Doarsa Kixa Xhelili – LVV-së: Hipokritë, vendimi i Kushtetueses s’varej nga Llabani, ai e katër gjyqtarë të tjerë votuan për rrëzimin e Qeverisë Hoti
Deputetja e Lidhjes Demokratike të Kosovës, Doarsa Kica Xhelili reagoi pas deklaratave Albulena Haxhiut nga LVV-ja e cila ka thënë se gjyqtari i Gjykatës Kushtetuese, nga radhët e komunitetit serb, Radomir Laban, dyshohet se është bashkëpunëtor i Agjencisë së Inteligjencës në Serbi (BIA) dhe se ka raporte të afërta me kryeterroristin Milan Radoiçiq.
Kica Xhelili i quajti “hipokritë” anëtarët e Vetëvendosjes..
“Hipokritësa! Dy nga gjyqtarët që e shpallën VV-në shkelëse të Kushtetutës, janë zgjedhur në këtë mandat – me votat e VV-së. Të tjerët? Kanë qenë në panele për plot raste që i kanë shkuar për shtat VV-së. Pesë prej tyre, përfshirë edhe Labanin – përveç se rrëzuan Qeverinë Hoti, kanë votuar PRO ligjeve të VV-së”, shkroi Kica Xhelili në një postim në Facebook.
“Madje edhe Ligjin për Këshillin Prokurorial – me të cilin mburreshit lart e poshtë – ua votoi ai. Dhe ju thoni që kishit qasje në informata që ai qenka spiun por kjo nuk iu pengoi kur e lejuat të vendoste për sistemin e DREJTËSISË? Heshtët sepse drejtësia ishte më pak e rëndësishme se t’a mbani ju pushtetin?”, shtoi ajo./
